Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins, MPH, Ph.D, hamutuk ho Prezidente Instituto Nacional de Formação de Docentes e Profissionais da Educação (INFORDEPE), Mestre Domingos Martins, halo abertura ba Kursu Baxarelatu Ensinu Báziku, iha Ensinu Básika Sentrál Dato, Munisípiu Likisa (06/10).
Magnífiku Reitór hateten, abertura kursu baxarelatu ba ensinu básiku ne'e hala'o iha teritoriu laran tomak, liuhusi akordu ne'ebé halo ona iha tinan kotuk, hodi kontinua fó formasaun ba profesór ensinu básiku iha munisípiu hotu.
"Liuhusi akordu ne'ebé, halo ona iha tinan kotuk, UNTL prontu atu bele halo formasaun tuir konteúdu kurrikulár ne'ebé iha no formasaun ne'e sei halo durante tinan tolu.
Hanesan Reitór husu ba profesór sira atu aproveita tempu hodi estuda nune'e sira bele hetan graduasaun durante tinan tolu oin mai", dehan Reitór.
Prezidente (INFORDEPE) nian, Mestre Domingos Martins, hatete formasaun ba etapa ne'e nian sei halo ba profesor sira hamutuk rihun ida atus rua hitu nulu resin lima, (1.275) iha teritóriu Timor laran.
"Formasaun ne'e realiza, tanba iha kooperasaun di'ak entre UNTL no INFORDEPE nomós ami tenta nafatin ba futuru atu koopera ho UNTL hodi bele hasa'e tan kualidade profesór sira-nian iha ensinu báziku iha teritóriu tomak", tenik Prezidente INFORDEPE.
Iha sorin seluk reprezentante estudante, Ezacop de Jesus Pereira, agradese ba Ministériu Edukasaun, UNTL no INFORDEPE, ne'ebé servisu hamutuk hodi realiza formasaun refere.
"Agradese ba Ministériu Edukasaun, UNTL no INFORDEPE ne'ebé servisu hamutuk hodi realiza programa kursu baxarelatu nian, no husu ba maluk profesór sira atu aproveita máximu formasaun ne'e nune'e durante tinan tolu nian laran ita bele finaliza estudu ho di'ak." Hateten Ezacop.
Partisipa husi Diretór Jerál Servisu Apoiu Reitoria, Sr. Jacinto H. S. Belo, Diretór Nasional Atendimentu Estudante (DNAE), Sr. Rui Loco Pires, Dosente husi FEAH UNTL, ekipa husi INFORDEPE, Profesór no Estudante sira.
#TimorLeste #UNTL #INFORDEPE #FEAH 06 Outubru 2023
Média UNTL 📝: Denilson Amandio Barros
Foto 📷: Denilson Amandiu Barros