Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH, Ph.D, ho Diretór Jeral GabCEDU nian, Profesór Doutór Rui da Cruz no Presidente GabCEDU Atual Proreitor ba Asuntu Planeamentu, Monitorizasaun no Avaliasaun Prof. Dr. Nelson Salsinha lansa Sistema Dijital ba dadus dosente nian, iha Auditóriu FECT-Hera, Díli (29/09).
“Ohin ita halo lansamentu ba sistema dadus dosente ne’ebé sei monta iha ita-nia universidade, sistema dijitalizasaun seluk mós ita sei foka ba administrasaun Akadémika ba rejistu estudante, tanba ne’e ohin ita iha Proreitór ba Asuntu Informatizasaun, Transformasaun Dijital no Inovasaun (PRAITDI), atu kria sistema Dijitalizasaun Universidade nian”, hateten Magnífiku Reitór iha sesaun abertura.
Reitór mos agradese ba servisu GabCEDU nian ne’ebé apoiu iha nia mandatu, tanba promete ona katak rejime kareira sai prioridade no agradese bele hetan aprovasaun iha Konsellu-Ministru, dadaun ne’e progresaun kareira implementa ona, ohin dosente sira to’o ona iha B3.
Iha fatin hanesan Diretór-Jerál GabCEDU Profesór Doutór Rui da Cruz mos hatutan, depoizde lansamentu, ekipa sei tun ba fakuldade sira atu esklarese klean liután ba dosente sira kona ba sistema online ne’e no planu sira ne’ebé sei halo iha futuru.
“Atividade ohin ne’e atu atualiza servisu ne’ebé mak ami hala’o durante tinan rua ba kotuk no planu ba futuru GabCedu nian, nune’e presiza tebes kolega sira-nia apoiu tanba ita-nia kolarborasaun sai hanesan indikadór ida ba futuru”, hateten Diretór Jerál GabCEDU.
Partisipa husi Visereitór, Proreitór, Dekanu, Dosente no ekipa Gabineti Sertifikasaun Dosente Universitáriu (GabCEDU).
#TimorLeste #UNTL #GabCEDU 5 Outubru 2023
Média UNTL 📝: Agostinho da Cruz e Silva
Foto 📷: Denilson Amandiu Barros