- Detalhes
- Escrito por Mateus Goncalves
- Visualizações: 379
Universidade Nacional Timor Lorosa’e (UNTL) nia Faculdade de Ciências Sociais (FCS) realiza semináriu hodi aprezenta rezultadu prelimináriu peskiza fakuldade nian 2023, ho tema “Hamutuk ho Siénsia Hakat ba Exelénsia” peskiza ne’ebé distribui ba departamentu hotu iha FCS nian, iha kampus Kaikoli UNTL nian, Díli (15/12).
Relasiona ho eventu ne’e Dekanu FCS nian, Profesór Doutór José António L. da Costa hateten, eventu ne’e importante tebes ba peskizadór husi departamentu neen hodi aprezenta sira-nia rezultadu prelimináriu.
“Fakuldade espera husi rezultadu prelimináriu ne’e ho rekomendasaun husi partisipante sira bele kontribui ba hariku liután dadus peskiza nian.
Agradese ba peskizadór sira, tinan ne’e departamentu neen mak halo peskiza, no ba tinan oin ita sei haloo boot liután, nune’e bele promove atividade peskiza iha área ne’ebé bele kontribui ba dezenvolvimentu”, hateten Dekanu.
Iha aprezentasaun Profesór Flávia A. Martins hateten, peskiza ne’ebé nia aprezenta aborda kona-ba “A dificiência do uso de língua portuguesa nos estabelecimentos de ensino e na administração pública em Timor-Leste”, peskiza ne’ebé halo tiha ona iha 2022 hetan apoiu husi CNIC (Centro Nacional de Investigação Científica). Embora peskiza ba fakuldade nian sei iha hela faze analiza inklui área terjetu balun seidauk foti dadus.
“Peskiza ne’e ami hala’o ho objetivu atu buka hatene kona-ba defisiénsia uzu Língua-Portugeza ho baze fundamentál ida mak dosente hanorin matéria língua-Portugeza no dosente ne’ebé hanorin matéria iha universidade liuliu FCS.
Nia defisiénsia barak tebes, tanba ita hanorin estudante sira defísil tebes iha espresaun eskrita no orál, preokupasaun mak se estudante sira la entende língua mak defisil komprende esensia husi konteúdu matéria ne’ebé sira aprende”, hateten.
Iha sesaun aprezentasaun nian departamentu idaidak hato’o rezultadu prelimináriu peskiza ne’ebé hala’o ona. Hafoin hetan apresiasaun husi fakuldade liuliu partisipante sira tantu Konsellu Doutór, dosente no estudante sira.
#TimorLeste #UNTL #FCS 15 Dezembru 2025
Média UNTL 📝: Miguel Gonçalves
Foto 📷: Miguel Gonçalves
- Detalhes
- Escrito por Mateus Goncalves
- Visualizações: 310
Universidade Nacional Timor Lorosa'e (UNTL) nia Magnífiku Reitór Prof. dr. João Soares Martins MPH. Ph.D hamutuk ho estrutura realiza serimónia agradesimentu liuhusi atribuisaun sertifíkadu apresiasaun ba premiadu Lusofónia na'in tolu (3) hanesan, Profesór Dr. Benjamin Corte-Real, Profesora Maria Ângela Carrascalão no Me. Guilhermina Marçal, FdCC, iha Resintu Kampus Liceu, Díli (14/12/23).
Iha serimónia ne'e, Reitór hato'o universidade nia orgullu boot ba premiadu na'in tolu, tanba hetan prémiu Lusofónia nian, hodi lori UNTL koñesidu iha mundu Lusofónia nian.
"UNTL orgullu boot tebes no hakarak hato'o parabéns ba premiadu na'in tolu, tanba manaan ona prémiu Lusofónia ne'e, hein durante tinan tolu, husi prémiu refere mak lori UNTL sai koñesidu ba Mundu Lusofónia, hatudu ona UNTL nia forsa hodi promove ensinu língua- Portugeza", tenik Reitór.
Reprezentante Premiada Me. Guilhermina Marçal, Fdcc, agradese ba UNTL, tanba rekoñese ona prémiu ne'ebé simu, orgullu ba primeiru prémiu ne’ebé simu hodi defende Direitu Umanu iha mundu Lusofónia nian.
"Orgullu no agradese ba rekoñesimentu ida-ne'e, kontente mós tanba mana'an ona premiu ne'e hodi defende direitu umanu nasaun ida-ne'e iha Mundu Lusofónia nian. Ida-ne'e fó avaliasaun atu ezerse funsaun responsabilidade bo'ot ba ha'u la’ós de'it nu'udar premiada, maibé mós servi ha'u-nia povu nu’udar knaar ne'ebé simu husi Maromak”, dehan Premiada ne'e .
Partisipa iha serimónia agradesimentu ne'e, Eis-Reitór sira, Visereitór, Proreitór, Diretór Jerál, Dreitór Nacional, Dekanu, Visedekanu, Diretór Departamentu, Dosente, Asistente Tékniku, Funsionáriu, estudante no konvidadu sira.
#TimorLeste #UNTL #FEAH 15 Dezembru 2023
Média UNTL 📝: Leonia de A. da Costa
Foto 📷: Eugenia de Jesus
- Detalhes
- Escrito por Mateus Goncalves
- Visualizações: 384
Universidade Nacional Timor Lorosa'e (UNTL) nia Magnífiku Reitór Prof. dr. João Soares Martins MPH. Ph.D asina Memorandu Entendimentu (MoU) ho Sra. Hilly Hendrika Bouwman husi Fundasaun Re-Inventa Produsaun Lokal (RELOKA) hodi koopera iha Prosesu Produsaun ba Kór Natural Tais Timor.
Iha Sala-Videokonferénsia UNTL nian, Díli (14/12), Reitór UNTL agradese ba Fundasaun RELOKA, tanba bele halo kooperasaun ho UNTL atu servisu hamutuk hodi dezenvolve patrimóniu liuliu ba kor natural tais Timor nian, inklui halo peskiza ba kor tais Timor nian.
"Interesante tebes ba ideia di’ak hirak ne'e atu bele fó hanoin fila fali ba Timoroan sira hodi prezerva didi’ak patrimóniu ne'ebé beiala sira husik hela, tanba ne'e agradese ba kooperasaun ne'e, espera katak ba oin sei envolve ami-nia estudante sira bazeia ba saida mak ita boot sira hato'o iha momentu ida-ne'e", dehan Reitór.
Iha fatin hanesan Diretora RELOKA Sra. Hilly Hendrika Bouwman hatete, kooperasaun ne'e atu servisu hamutuk hodi dezenvolve kor natural tais Timor nomós ekonomia, agrikultura, turizmu, sei halo mós peskiza espesífika ba kor natural tais nian.
"Ami hanoin mós atu dezenvolve Jardin Britániku ne'ebé sei halo iha Hera, atu bele atrai vizitante sira, maibé prinsipalmente iha memorandu ida-ne'e, ami hakarak envolve estudante sira atu aprende produsaun kor natural tais Timor inklui halo peskiza ba kor tais Timor nian,"tenik Diretora Hendrika.
Iha serimónia ne'e, partisipa husi Visereitór, Diretór Jerál ba Apoiu Reitoria nu'udar mós dosente ba Materia Turizmu iha FEG UNTL, Sr. Jacinto Belo, asistente tékniku no funsionáriu sira.
#TimorLeste #UNTL #RELOKA 14 Dezembru 2023
Média UNTL 📝: Mario Joni Mendonça
Foto 📷: Leonia de A. da Costa
- Detalhes
- Escrito por Mateus Goncalves
- Visualizações: 283
Universidade Nacional Timor Lorosa’e (UNTL) nia Magnífiku Reitór Prof. dr. João Soares Martins MPH, Ph.D asina Memorandu Entendimentu (MoU) ho Diretora Blue Ventures Timor-Leste Sra. Bernardete da Fonseca, iha sala Video-Conferência UNTL nian, Díli (14/12), hodi koopera iha área Siénsia Mariña, Konservasaun no Peskiza.
Iha serimónia asina MoU ne'e, Reitór UNTL agradese ba ba Blue Ventures, tanba bele halo kooperasaun ho universidade hodi koopera iha asaun hamutuk ba konserva tasi no eduka peskazadór sira atu bele kuida rekursu sira iha tasi.
"Ami mós apresia tebes, tanba bele envolve estudante sira husi Kursu Siénsia Mariña nian iha atividade sira no ami espera estudante no profesór sira husi kursu Peska no Siénsia Mariña bele halo kooperasaun di’ak liutan, iha área sira mak ita boot sira oferese”, dehan Reitór.
Iha fatin hanesan, Diretora Blue Ventures Timor Leste Sra. Bernardete da Fonseca hatete, ne’e hanesan onra boot ida bele mai tur hamutuk hodi kopera servisu hamutuk iha área Konservasaun, Peskiza, no iha área Mariña nian hodi fó mós kapasitasaun ba peskadór sira atu bele konserva rekursu iha tasi.
"Ha’u mós espera ita-nia kolaborasaun la’o di’ak iha futuru, tanba ami mós envolve estudante sira iha halo survei iha komunidade, atu oinsá bele identifika atividade saida mak sira hakarak atu hala’o no ami mós fó opurtunidade ba alin estudante atu bele halo estájiu no peskiza humutuk”, tenik Diretora Fonseca.
Iha serimónia ne'e, partisipa husi Proreitór Asuntu Kooperasaun (PRAK), Profesór Tomé Xavier Jerónimo, Dekanu FAGRI Profesór Vicente de Paulo Correia, Ph.D, Diretór Departamentu Peskas Siénsia Mariña Profesór Abilio da Fonseca, asistente tékniku no funsionáriu sira, inklui estudante sira.
#TimorLeste #UNTL #BlueVentures 14 Dezembru 2023
Média UNTL 📝: Laurindo da Cruz Gomes
Foto 📷: Pio Belo Ximenes
- Detalhes
- Escrito por Mateus Goncalves
- Visualizações: 299
Universidade Nacional Timor Lorosa'e (UNTL) simu fasilidade desportu Auto-Gym ne'ebé feitu ona iha resintu Kampus Sentrál UNTL nian, fasilidade ne’e oferese husi Oganizasaun Saúde Mundial (OMS) iha loron 13 fulan Dezembru tinan 2023 ne'e.
Magnífiku Reitór, Prof. dr. João Soares Martins, MPH, Ph.D, agradese ba OMS, tanba oferese ona fasilidade ne'e ba UNTL, hanesan motivasaun di'ak ba universidade atu bele dezenvolve atividade desportiva ba sivitas tomak liuliu ba estudante kursu desportu nian.
"Ami hakarak hato'o apresiasaun no agradesimentu ne'ebé klean tebes, ho fasilidade ne'e aumenta mós papel UNTL nian, hodi promove kursu desportu no atividade desportiva iha UNTL", dehan Reitór.
Iha fatin hanesan, reprezentante OMS iha Timor-Leste, Dr. Arvid Mathur hato’o, parabéns ba UNTL tanba simu ona fasilidade ne'ebé sei uza iha kursu Ensinu Fizika no Desportu, ne'e estratéjia di'ak ba ema hotu iha UNTL.
"Parabéns ba UNTL, tanba simu ona fasilidade ne'e, liuliu ba kursu Edukasaun Fizika no Desportu ne'e estratéjia di'ak tebes ba ema hotu iha universidade, ho fasilidade ne'e, fiar katak bele ajuda prátika ba estudante sira" tenik Dr. Arvid Mathur.
Fasilidade Auto-Gym ne'e finaliza iha tinan 2022, parte rua tenta atu inaugura, maibé la konsege foin halo inaugurasaun.
Partisipa iha serimónia ne'e, Visreitór, Proreitór, Diretór Jerál, Diretór Nasional, Funsionáriu, estudante no ekipa husi OMS nian.
#TimorLeste #UNTL #OMS 13 Dezembru 2023
Média UNTL 📝: Leonia de A. da Costa
Foto 📷: Denilson A. Barros