- Detalhes
- Escrito por Mateus Goncalves
- Visualizações: 1137
#TimorLeste #UNTL 25 Fevereiru 2021
Universidade Nacional Timor Lorosa’e (UNTL), liuhusi Visereitor ba Asuntu Akadémikus no Garantia Kualidade, Profesór Doutór Samuel Venâncio de Sousa Freitas, ho Visereitora ba Asuntu Estudantís, Profesora Eng. Lígia Tomás Correia, M.Sc, hala'o reuniaun téknika ho Visedekanu Asuntu Akadémiku no Estudantil kada Fakuldade hodi desidi modelu orientasaun ba estudante foun períodu 2021.
Iha reuniaun téknika ne'e desidi katak Orientasaun Akadémiku ba estudante foun 2021, sei realiza liuhusi sistema dijitál (Zoom) no hili reprezentante estudante na’in lima (5) kada departamentu hodi partisipa abertura ofisial iha Auditóriu Fakuldade Enjeñaria, Siénsia no Teknolojia UNTL nian, Hera-Díli.
“Orientasaun sei realiza durante loron tolu, dahuluk abertura ofisial, estudante sira partisipa liuhusi Zoom (Departamentu ne’ebé preparadu), no ami sei hili estudante na’in lima kada Departamentu hodi partisipa iha abertura no missa, tanba ita enfrenta hela surtu COVID-19,” tenik Visereitora Asuntu Estudantíl, Eng. Lígia Tomas Coreia, M.Sc, iha Gabinete Reitória UNTL nian, Díli (24/02).
Visereitora ne’e hatutan katak atividade ba loron daruak orientasaun kada Fakuldade no Departamentu atu fo tulun ba orientador sira atu atinji konkordánsia (orienta) kona-ba implementasaun regulamentu ne’ebé loos, atu nune’e solusiona asuntu sira estudante nian.
“Aleinde atividade akadémiku iha loron datoluk realiza ho atividade estrakurikulár (Kampus Verde no Reflorestasaun) iha fatin ne’ebé indentifika ona”, tenik Visereitora Lígia.
Visereitora salienta katak, realiza orientasaun akadémika atu hatene mós kona-ba kondisaun estudante sira husi parte ensinu superiór, ho métodu dezenvolvimentu iha nível nasionál no haree mós kona-ba koñesimentu dinámika estudante nian iha ambiente universitáriu.
Média UNTL 📝: Leonia Araújo (estajiária)
Foto 📷: Leonia Araújo (estajiária)
- Detalhes
- Escrito por Mateus Goncalves
- Visualizações: 4789
#TimorLeste #UNTL #FEJ 24 Fevereiru 2021
Universidade Nacional Timor Lorosa'e (UNTL) nia Magnífiku Reitór, Profesór dr. João Soares Martins, MPH, Ph.D akompaña husi Visereitóra ba Asuntu Estudantil, Eng. Lígia Tomas Correia, M.Sc hala'o enkontru ho Dekanu Fakuldade Ekonomia no Jestaun (FEG), Profesór Custódio Barata Ximenes, ho nia estrutura, hodi ko’alia kona-ba nesesidade fakuldade nian, dezafiu no planu sira.
Iha Sala Vídeo Konferénsia UNTL nian, Díli, (24/02), Dekanu FEJ nian aprezenta katak nia fakuldade presiza halo rekrutamentu ba dosente, no solisita mós Reitor nia apoiu hodi fasilita dosente sira ne’ebé sei hala’o estudu iha nasaun seluk hodi finaliza sira-nia estudu.
Liuhusi enkontru refere Dekanu mós hato’o kona-ba kondisaun jerál fasilidade hanesan saladeaula ba prosesu aprendizajen, eskritóriu ba pesoál administrasaun, no dosente sira fakuldade nian no asuntu relevante sira seluk.
Média UNTL 📝: Agostinho da Cruz e Silva
Foto 📷: Agostinho da Cruz e Silva
- Detalhes
- Escrito por Mateus Goncalves
- Visualizações: 4977
#TimorLeste #UNTL 23 Fevereiru 2021
Universidade Nasional Timor Lorosa’e (UNTL) nia Visereitór Asuntu Akadémika no Garantia Kualidade, Profesór Doutór Samuel Venâncio de Sousa Freitas, iha Kampus Sentral UNTL nian, Díli (19/02) hateten katak estrutura universidade nian sei reuni hodi diskute preparasaun no modelu ba orientasaun estudante foun tinan akadémiku 2021.
“Dadaun ne’e, parte universidade nian sei hein totál dadus estudante foun kada Fakuldade nian ne’ebé rejistadu, hafoin reuni hodi diskute implementasaun ba orientasaun akadémika nian, ita presiza deside hamutuk ho estrutura hotu fakuldade nian, nune’e bele haree formatu ka modelu orientasaun ba estudante foun tinan akadémika 2021 nian”, dehan Visereitór.
Visereitór mós hatutan tan katak hafoin desidi tiha formatu orientasaun maka, sei forma komisaun ba orientasaun nian husi nível universidade to’o fakuldade rasik, maibé prinsipalmente sei hein dadus husi estudante ne’ebé konsege rejista.
“Dadus ne’e importante tebes atu ajuda no hafasil estrutura sira hodi bele implementa orientasaun ba estudante foun sira ho diak”, tenik Visereitór.
Atualmente estudante foun ba 2021 nian to’o iha sesta 19 fevereiru liubá estudante hamutuk 1761 mak resjita ona, husi total 5282 ne’ebé admitidu no hirak seluk sei iha hela faze rejistu, no faze tuir mai mak (1) orientasuan akadémika, no (2) bele ona partisipa iha aula iha área oioin ne’ebé universidade nasionál eferese.
Média UNTL 📝: Leonia de Araújo (estajiária)
Foto 📷: Leonia de Araújo (estajiária)
- Detalhes
- Escrito por Mateus Goncalves
- Visualizações: 998
#TimorLeste #UNTL #IPB 23 Fevereiru 2021
Universidade Nacional Timor Lorosa'e (UNTL) nia Magnífiku Reitór, Profesór dr. João Soares Martins, MPH, Ph.D partisipa iha serimónia Dies Natalis Institutu Politékniku Betano (IPB) nian ba dahaat (IV), iha Kampus IPB Kay Rala Xanana Gusmão-Betano, Munisípiu Manufahi.
Hafoin serimónia Dies Natalis ba da-IV, Prezidente IPB Profesór Doutór Acacio Cardoso Amaral, lori mós Reitór UNTL ho nia ekipa ba vizita Laboratóriu Prátika IPB nian ba Haki’ak Animál (bibi, no karau), Konstrusaun Sívil no fatin Manu Luhan.
Reitór UNTL iha lokál serimónia akompaña husi Visereitora ba Asuntu Estudantíl, Profesora Eng. Lígia Tomas Correia, M.Sc, Proreitora ba Asuntu Kooperasaun, Profesora Doutora Lídia Gomes, SKM, M.D., Proreitór ba Asuntu Dezenvolvimentu Institusional, Profesór Doutór Lelis Gonzaga Fraga, Diretór Sentru Investigasaun Sientífika, Profesór Doutór José António Lourenço da Costa no ekipa apoiu reitorál.
Média UNTL 📝: Agostinho da Cruz e Silva
Foto 📷: Agostinho da Cruz e Silva
- Detalhes
- Escrito por Mateus Goncalves
- Visualizações: 894
#TimorLeste #UNTL #FCS 23 Fevereiru 2021
Universidade Nasional Timor Lorosa’e (UNTL) liuhusi Fakuldade Siénsia Sosiál ( FCS) nia prosesu aprendizajen ba kursu Dezenvolvimentu Komunitáriu no Inkluzaun Komunitária Sosiál fó espasu no oportunidade ba sidadaun defisiente sira atu partisipa mós iha edukasaun superiór nian.
‘’Kursu Dezenvolvimentu Komunitáriu no Inkluzaun Komunitária Sosiál (DC-ICS) iha FCS oferese fatin no oportunidade aprendizajen ba timoroan sira ne’ebé ho kondisaun defisiente”, tenik Dekanu FCS, Profesór Camilo Ximenes Almeida, iha Kampus Kaikoli UNTL nian, Díli (22/2).
Dekanu mós reforsa tan katak, UNTL iha estudante sira ho kondisaun fízika dezabilidade barak mak estuda iha universidade nasionál, no FCS iha kursu ida espesiál ba área refere.
“Aleinde sai fatin espesiál, haree ba situasaun atuál, atu respeita sidadaun universitáriu sira ho dezibilidade, ami esforsu utiliza linguajen hanesan bele uza linguajen defisiente matan, defisiente tilun, defisiente ain, defisiente liman, no agora ita mós esforsu atu muda ema-nia pensamentu ba utilizasaun liafuan ne’ebé merese no dignu ba sira” tenik Dekanu FCS.
Dekanu mós hatutan katak iha kursu Inkluzaun Komunitária Sosiál, planeaatu eleva tan kapasidade profesór sira-nian liuhusi treinamentu, no envolve estudante dezabilidade sira iha infraestrutura hodi sira mós bele hetan oportunidade tuir orientasaun ne’ebé iha.
Iha fatin hanesan, estudante Departamentu Inkluzaun Komunitaria Sosial, Gilberta do Santos Pereira sente kontente hodi aprende maské ho kondisaun defisiente matan, maibé la lakon oportunidade ba edukasaun hanesan ema seluk.
“Ha’u senti kontenti tanba hola parte iha prosesu edukativu nian, no agradese mós ba Governu Timor-Leste, liuliu UNTL tan bele kria ona espasu inkluzivu, edukasaun, ema ho tipu defisiensia oioin bele asesu ba edukasaun’’, agradese Gilberta.
Estudante ne’e hatutan, iha etápa aprende nian, hanesan difisiénsia matan aprende uluk letra braim no bele adapta ho kondisaun mezmu la bele haree no prosesu liuhusi rona halo analiza hodi bele kompriende.
Média UNTL 📝: Denilson A. Barros (estajiáriu)
Foto 📷: Denilson A. Barros (estajiáriu)