- Detalhes
- Escrito por Mateus Goncalves
- Visualizações: 1279
#TimorLeste #UNTL 13 Agostu 2020
Universidade Nacional Timor Lorosa’e (UNTL) nia Magnífiku Reitór, Profesór Doutór Francisco Miguel Martins, ho nia estrutura simu proposta husi reprezentante komunidade Munisípiu Baucau nian, Sr. José Viegas, ho nia ekipa ne’ebé husu atu loke ramu universidade nasionál nian iha parte leste.
Hafoin simu tiha proposta, iha Kampus Sentrál UNTL nian, Díli, Reitór hateten katak universidade ho orgullu simu proposta refere, no pasu tuir mai sei ba aprezenta iha Konsellu Jestaun UNTL nian hodi diskute konteúdu dokumentu nian antes aprova.
“ Bainhira hetan ona aprovasaun, UNTL sei harii ekipa ida, hodi tun ba baze atu halo enkontru ho Prezidenti Munisípiu, Sr. António Augusto Guterres, no proponente sira inklui komunidade rasik bazeia ba dokumentu ne’ebé hato’o, inklui mós estudu viabilidade”, hateten Reitór UNTL.
Entretantu reprezentante komunidade Baucau nian, Sr. José Viegas, hateten katak, Universidade Nasionál to’o ona tempu hodi hakbesik liután ba komunidade.
“UNTL hanesan sentru kriasaun, difuzaun no promosaun kultura, siénsia no teknolojia, artikulasaun estudu no investigasaun, ho modu atu aumenta dezenvolvimentu umanu, nu’udar fatór estratéjiku ba dezenvolvimentu Timor-Leste”, dehan José Viegas.
Partisipa iha entrega proposta ne’e husi parte UNTL nian, Proreitór Asuntu Estudantíl, Profesór Zeferino Viegas Tilman, Diretór-Jerál Asuntu Akadémiku, Sr. Armindo Leto Fátima, Diretór Nasionál Rekursu Umanu, Sr. Agostinho Quelo, ekipa alumni-UNTIM, intelektual no reprezentante komunidade Baucau.
Média UNTL 📝 : Mateus Gonçalves
Foto 📷 : Mateus Gonçalves
- Detalhes
- Escrito por Mateus Goncalves
- Visualizações: 1367
#TimorLeste #UNTL #MOP 13 Agostu 2020
Universidade Nacional Timor Lorosa’e (UNTL) nia Magnífiku Reitór, Profesór Doutór Francisco Miguel Martins, halo sorumutuk ho Diretór Empreza Aitula Unipesoál. Lda nian, Sr. Silveiro Ferreira Maubere, ne’ebé responsável ba konstrusaun edifísiu rua, iha Kampus Sentrál no Fakuldade Ekonómia no Jestaun nian (FEJ), hodi ko’alia kona-ba progresu konstrusaun nian.
Reitór iha Sala Video-Konferénsia kampus sentral UNTL nian, Díli (12/08) hateten katak enkontru refere atu komunika ba malu kona-ba progresu konstrusaun nian hodi aselera ba oin.
“Haree ba progresu konstrusaun iha kampus sentrál ne’e rasik foin 26,34%, nune’e mós iha kampus FEJ nian 24,20%. Konstrusaun rua ne’e mak ita haree tarde liu, tanba ne’e konvida ita mai iha ne’e, atu buka nia solusaun hodi aselera nia progresu”, tenik Reitór.
Iha fatin hanesan, Diretór Kompañia Aitula rekoñese katak konstrusaun ba edifísiu tarde tamba traballadór parte tékniku na’in ne’en fila ba sira-nia rain seidauk mai fali maibé sei buka meiu atu aselera prosesu konstrusaun ne’e.
“Konstrusaun edifísiu rua ne’e ami rekoñese tarde duni, tanba traballadór nain ne’en husi estranjeiru seidauk fila mai tanba ita enfrenta hela Estadu Emenjénsia liga ho COVID-19, maibé agora ba oin ami sei buka meiu hodi halais kontrusaun ne’e”, tenik Diretór Maubere.
Enkontru ne’e partisipa husi Proreitór ba Asuntu Dezevolvimentu Institusionál, Profesór Leonel Madeira, ho nia ekipa, Diretór Nasional Aprovisionamentu, Sr. Afonso Lopes, representante husi Ministériu Obras Públika nian, Sr. Domingos Sequeira ho Sr. Octavio Pereira, no enjeñeiru no ekipa Aitula nian.
Média UNTL 📝 : Agostinho da Cruz e Silva
Foto 📷 : Agostinho da Cruz e Silva / João Bosco Alves (estajiáriu)
- Detalhes
- Escrito por Mateus Goncalves
- Visualizações: 1776
#TimorLeste #UNTL #FCS 12 Agustu 2020
Universidade Nacional Timor Lorosa’e (UNTL) nia Magnífiku Reitór Profesór Francisco Miguel Martins ho nia estrutura no sivitas tomak hato’o omenajen ikus ba Profesora Maria Madalena L. Koten MGPP ne’ebé husi ona nia knar hanesan dosente iha Departamentu Administrasaun Públika, Fakuldade Siénsia Sosiál.
“Profesora Maria ne’ebé hatudu dalan ba formasaun joven sira no prepara sira atu simu estafeta desenvolvimentu nian ba futuru, ohin (10-O8-2020) fila hikas ba Aman Maromak Nia Kadunan Santu”, Despede Reitór UNTL Profesór Doutór Francisco Miguel Martins, iha Kampus Kaikoli UNTL nian, Dili (11-08).
Reitor mós hatutan tan katak UNTL presta omenajen ida ikus, ba profesora matebian no, hamutuk ho sivitas tomak ho orasaun husu ba Aman Maromak atu tulun nia klamar atu hetan moris rohan la’ek nian.
Profesór Martins rekorda katak profesora Maria Madalena L. Koten hahú nia knar hanesan dosente dezde tinan 2000, bainhira universidade hahú ezista iha Timor-Leste.
“’Profesora ne’e ema ida ne’ebé partisipa iha grupu oioin de’it grupu ne’ebé lori nia ba di’ak karismátika grupu ne’ebé sustenta nia iha moris saudavel nomós ba di’ak ida ikus nian, maibé ohin universidade ho triste tan lakon ona nia” hatutan.
Entretantu família profesora nian Sra Sara de Jesus Oliveira ho triste tebes tanba matebian husi hela família no kompleta ona nia jornada moris nian iha mundu.
“Família sente lakon tebes tanba ema ne’ebé ho hahalok di’ak iha uma laran no sempre ho nia simplisidade akadémika ne’ebé di’ak ba ema hotu husik hela família iha momentu ne’e”, haktuir Sra. Oliveira.
Profesora Maria moris iha (09 Maio 1968) no hahú nia estudu Primária iha Eskola Santa Maria Goreti Flores, Pre-Sekundária no sekundária iha Pranta Makaria Sulawesi (1987), remata nia estudu lisensiatura iha Universitas Indonesia (1992), no Mestradu iha Universidade do Minho Portugál 2013 iha área Jestaun Polítika Públika.
To’o remata nia viajen iha mundu, aleinde kualifikasaun akadémika nia mós partisipa iha atividade oioin konferénsia, semináriu inklui grupu oioin.
Iha parte família, matebian husi hela nia kaben Sr. David Silva ho nia oan na’in lima, enkuantu iha UNTL husik hela nia maluk dosente sira no nia estudante sira iha Departamentu Administrasaun Públika.
Média UNTL : Ines Da Costa Rosignani (Estajiária )
Foto : Honorio Guteres (Estajiáriu)
- Detalhes
- Escrito por Mateus Goncalves
- Visualizações: 2082
Diretór Ezekutivu Nasionál Compact Development Team Timor-Leste (CDT-TL) nian, Embaixador Constâncio da Conceição Pinto kaer liman ho Magnífiku UNTL Reitór, Prof. Doutór Francisco Miguel Martins
#TimorLeste #UNTL #PCM #CDT-TL 13 Agostu 2020
Universidade Nacional Timor Lorosa’e (UNTL) nia Magnífiku Reitór, Prof. Doutór Francisco Miguel Martins, reuniaun ho Diretór Ezekutivu Nasionál Compact Development Team Timor-Leste (CDT-TL) nian, Embaixador Constâncio da Conceição Pinto, Vise-Diretór Ezekutivu, Sr. Mario D. Q. Carmo, ho ekipa husi CDT-TL nian, iha Kampus Sentral UNTL nian, Díli (11/7), hodi diskute Formasaun Profesór ba Nível Ensinu Sekundáriu.
Objetivu husi reuniaun refere atu rona pedidu CDT-TL nian hodi atualiza progresu dezenvolvimentu iha Timor-Leste, inklui mós estudu viabilidade ba projetu edukasaun, hodi estabelese Sentru Exelénsia ba Formasaun Nível Ensinu Sekundáriu nian.
Reitór UNTL nian hateten katak investimentu iha kualidade ba profesór nian importante hodi eleva kapasidade joven sira-nian atu simu estafeta prosesu dezenvolvimentu nasionál Timor-Leste nian.
UNTL iha kursu sira iha Fakuldade Edukasaun, Arte no Umanidade (FEAH) ne’ebé sai oferta formativa ba formasaun profesór sira-nian, tuir ita-nia mehi hakarak atinje kualidade umanu ne’ebé kualifikadu, hateten Magnífiku Reitór.
Entretantu Diretór Ezekutivu CDT-TL nian, Embaixador Constâncio da Conceição Pinto, hateten katak reuniaun ne’e hodi diskuti kona-ba projetu ne’ebé promove liu husi ajénsia husi Estadus Unidus Amérika 🇺🇸 “Millennium Challenge Corporation”, liuliu kona-ba projetu Edukasaun nian, iha sentru formasaun profesór ba ensinu sekundária nian.
“Hamutuk ho instituisaun ensinu superiór hanesan UNTL, neste momentu halo hela estudu balun inklui selesaun ba terrenu no konstrusaun edifísiu ba formasaun nian”, dehan Embaixador.
Sr. Constâncio mós hatutan tan katak CDT-TL hahú kooperasaun ho UNTL tanba hare’e ba papel importante iha área promosaun professor nian no asegura implementasaun ho sustentabilidade sentru exelénsia ne’e iha futuru.
Média UNTL 📝 : Mateus Gonçalves
Foto 📷 : Moizes do Rego
- Detalhes
- Escrito por Mateus Goncalves
- Visualizações: 4915
#TimorLeste #UNTL #FA 11 Agostu 2020
Universidade Nacional Timor Lorosa’e (UNTL), liuhusi Fakuldade Agrikultura nia Departamentu Agro-Sosiu-Ekonomia (ASE), dezloka estudante na’in atus ida ruanulu resin ualu (128) ba Munisípiu Aileu hodi partisipa iha prátika-kampu kona-ba Sosiolojia Rurál.
“Prátika ne’ebé realiza ho objetivu atu lori sira ba iha baze atu implementa siénsia hamutuk ho inan-aman sira liuhusi identifika problema, buka solusaun no analiza informasaun sira mak hetan iha kampu hanesan referénsia fundamentál”, hateten Diretór Departamentu ASE, Profesór Mateus de Jesus Gomes, iha Kampus Sentrál UNTL nian (6/8), Díli.
Profesór Mateus salienta katak maske enfrenta dezafiu liga ho finansiamentu, inklui mós situasaun atuál liga ho COVID-19, maibé prátika-kampu ba estudante sira, importante tanba bele aprende husi komunidade iha área rurál.
“Iha ne’eba atu aprende buat ruma hosi inan aman sira ne’ebé iha knua hanesan buka’e liuhusi identifika dezafiu, analiza no buka solusaun sira liga ho produsaun agríkola nian no kompartila ho siénsia ne’ebé sira aprende ona iha Sosiolojia Rurál”, dehan Profesór Mateus.
Entretantu, pratikante Milenia Leonor de Carvalho Guteres Luis hateten, kona-ba materia ne’ebé aprende ona hodi partilla ba komunidade agrikultór sira iha área rurál no aprende mós husi referénsia ne’ebé hetan iha terrenu.
“Ami halo prátika-kampu ne’e, atu apar ho teoria sosiolojia rurál ne’ebé ami hetan ona durante prosesu apredizajen, atu hatene realidade no aplikasaun teoria nian ne’ebé ami hetan ona iha komunidade”, tenik Milenia.
Atividade prátika kampu refere partisipa husi estudante sira semestre tolu (3) nian na’in 128, ho durasaun loron haat no dezloka ba Munisípiu Aileu iha 5 Agostu 2020 liuba.
Média UNTL : Agostinho Ximenes da Cruz (estajiáriu)
Foto : Agostinho Ximenes da Cruz (estajiáriu)