- Detalhes
- Escrito por Mateus Goncalves
- Visualizações: 950
TimorLeste #UNTL #PDI #COVID19 #COVID19TL 18 Marsu 2021
Universidade Nacional Timor Lorosa’e (UNTL) nia progresu konstrusaun ba edifísiu foun tolu ne’ebé ida lokaliza iha Kampus Sentrál atinje ona (44, 94%), ida iha Fakuldade Ekonomia no Jestaun (54, 88%), enkuantu konstrusaun edifísiu ba Fakuldade Medisina no Siénsia Saúde (FMCS) nian iha Kaikoli atinje ona (91.51%), iha fulan marsu 2021.
“Edifísiu tolu dadaun ne’e prosesu konstrusaun la’o hela hanesan edifisu ba Fakuldade Medisina no Siénsia Saúde nian atinji ona pursentu 91.51, Fakuldade Ekonomia no Jestaun atinji ona pursentu 54,88 no edifísiu iha Kampus Sentrál atinji pursentu 44,94”, hateten Profesór Doutór Lelis Gonzaga Fraga, iha Kampus Sentrál UNTL nian, Díli (18-3).
Proreitór ne’e mós hatutan katak durante ne’e sira nafatin observa konstrusaun sira iha balun atu finaliza ona, hela de’it servisu fíziku balun hanesan pinta, monta janela no seluk tan no balun ne’e esforsu hela atu finaliza tuir tempu.
Iha fatin hanesan, Diretór Kompañia Aitula Unip. Lda, Sr. Silveiro Ferreira Maubere hateten katak nia traballadór sira antes implementa Serka Sanitária iha munisípiu Díli hela ona iha lokál kontrusaun nomós materiál mós sufisiente ba sira hodi halo servisu.
“Durante serka sanitária iha Díli, ami-nia traballadór sira antes ne’e hela iha fatin servisu, no materiál sira antes nia stok ami prepara ona hodi fasilita sira hakmatek iha fatin hodi halo servisu”, tenik Diretór Kompañia Aitula.
Alende ne'e, Supervizór husi Kompañia Linier Unipessoal, Lda, Enjeñeiru Marino Belo Guterres, hateten katak projetu ne’ebé sira responsabiliza ba atinji ona pusentu 91.51 no dadaun ne’e sira esforsu hodi finaliza tuir tempu.
“Konstrusaun ba edifísiu UNTL nian iha Kaikoli ne’e, atinji ona pursentu 91,51 pursentu no ami-nia traballadór dadaun ne’e esforsu atu finaliza tuir nia tempu, no durante serka sanitaria ami nafatin kumpri protokolu husi Ministériu Saúde”, tenik Sr. Marino.
UNTL nia edifísiu tolu ne’e inisia konstrusaun iha 2019, no kompañia ne’ebé responsabiliza ba edifisiu tolu ne’e maka Edifisiu Kampus Sentral no ida iha Fakuldade Ekonomia no Jestaun responsabiliza husi Empreza Aitula Unipessoal, Lda, no ida seluk iha Kampus Kaikoli Responsável husi Linier Unipessoal. Lda.
Média UNTL 📝: Agostinho da Cruz e Silva
Foto 📷: Agostinho da Cruz e Silva
- Detalhes
- Escrito por Mateus Goncalves
- Visualizações: 911
#TimorLeste #UNTL #VRAAGK #COVID19 #COVID19TL 17 Marsu 2021
Universidade Nacional Timor Lorosa’e (UNTL) nia Visereitór ba Asuntu Akadémiku no Garantia Kualidade (VAAGK), hetan knaar husi Magnífiku Reitór hodi koordena estrutura Fakuldade sira atu rekolla dadus ba estudante sira ne’ebé hela iha alojamentu (kos) hodi hetan apoiu husi Ministériu Soliedariedade Sosiál no Inkluzaun (MSSI), durante implementasaun serka sanitária iha munisípiu Díli.
Visereitór ba Asuntu Akadémiku no Garantia Kualidade, Profesór Doutór Samuel Venâncio de Sousa Freitas, iha nia knar fatin Kampus Sentrál UNTL nian hateten, rekolla dadus ne’e estrutura iha kada Fakuldade ho nia diretór Departamentu sira maka rekolla uza meiu elektroniku husi estudante sira ne’ebé hela iha alojamentu.
“Husu ba Diretór Departamentu sira ho nia estrutura bele uza meiu komunikasaun sira, hanesan fó e-mail Departamentu ka númeru WhatsApp ba estudante sira atu bele envia formuláriu (https://tinyurl.com/4npjcr4m) ne’ebé prienxe ona kona-ba subsidiu durante Serka-Sanitária hodi sertifika dokumentu sira ne’e antes haruka ba Ministériu Ensinu, Superiór Siénsia no Kultura (MESSK) liuhusi UNTL” tenik Visereitór.
Vicereitór ne’e mós hatutan katak dokumentu sira tenki envia ba Departamentu tanba departamentu ho Fakuldade sira mak besik no koñese di’ak liu, nia estudante sira ne’ebé durante ne’e hela iha kos hodi partisipa iha estudu.
Iha fatin hanesan, Dekanu Interinu no Vicedekanu Asuntu Akadémiku Fakuldade Enjeñaria, Siensia no Teknolojia (FECT), Profesór Doutór Junior Raimundo da Cruz, liuhusi via telefone hateten katak nia Fakuldade dadaun ne’e liuhusi Departamentu idak-idak rekolla ona dadus husi estudante sira ne’ebé hela iha kos.
“Prosesu rekolla dadus dadaun estudante sira kontaktu hela idak-idak nia Departamentu hodi haruka dokumentu sira liuhusi meiu komunikasaun hanesan e-mail” tenik Profesór Junior.
Dekanu Interinu ne’e hatutan kada Departamentu rekolla hotu estudante sira-nia dokumentu maka foin sub-mete ba Fakuldade no Fakuldade halo rekapitulasaun hodi sub-mete ba iha Universidade.
🔹 Bele download formuláriu refere iha ne'e: https://tinyurl.com/4npjcr4m
Média UNTL 📝 : Agostinho da Cruz e Silva
Foto 📸 : Agostinho da Cruz e Silva
- Detalhes
- Escrito por Mateus Goncalves
- Visualizações: 872
#TimorLeste #UNTL #KIPKI #COVID19 #COVID19TL 15 Marsu 2021
Universidade Nacional Timor Lorosa’e (UNTL) liuhusi Komisaun ba Implementasaun Planu Kontijénsia Interna (KIPKI) servisu hamutuk ho ekipa husi Ministériu Saúde nian hodi halo dezinfeta ba resintu UNTL hanesan gabinete reitoria, eskritóriu administrasaun, no dosente sira-nian, inklui saladeaula sira.
Koordenadora ekipa KIPKI nian, Professora Teresa António Madeira Soares, BDS, MPH iha Kampus Sentrál UNTL nian, Díli, hateten katak Ekipa KIPKI husu Ministeriu Saúde hodi dezinfeta ba fatin sira iha universidade nian, no atividade ne’e hanesan meiu prevensaun ba COVID-19.
“Ohin ne’e sira ekipa konjunta husi Cruz Vermelha no Ministériu Saúde nian mai tanba KIPKI mak husu atu dezinfeta ba ita-nia fatin tanba horiseik ita simu informasaun dehan UNTL nia estudante ida ho dosente ida mak pozitivu ona COVID-19, nune’e, husu sira atu dezinfeta gabinete pesoál ne’ebé pozitivu ne’e, no aproveita dezinfeta ba gabinete reitoria no aula sira”, hateten Profesora.
Diretora ba Poliklínika Universitáriu-UNTL nian ne’e mós hatutan Komisaun ba Implementasaun Planu Kontijénsia Interna iha UNTL estabelesedezde tinan 2020, liubá, no dadaun ne’e aleinde dezinfeta no sei haree kona-ba fasilidade sira ba prevensaun surtu COVID-19 iha universidade nasionál.
Média UNTL 📝 : Agostinho da Cruz e Silva
Foto 📸 : Mateus Goncalves
- Detalhes
- Escrito por Mateus Goncalves
- Visualizações: 1558
#TimorLeste #UNTL #COVID19 #COVID19TL 17 Marsu 2021
Universidade Nacional Timor Lorosa’e (UNTL) nia Magnífiku Reitór, Profesór dr, João Soares Martins, MPH, Ph.D, laiha koñesimentu no lamenta ho informasaun ne’ebé lansa iha média sosiál “Facebook” ne’ebé hato’o katak eskola hotu sei taka to’o 2022, no konsidera HOAX (informasaun laloos).
“Ha’u lamenta tebes ho informasaun ne’ebé lansa iha públiku, ami diskute duni kona-ba utilizasaun Zoom, Google Classroom no instrumentu online sira, maibé ne’e la’ós buat foun, tanba aplika ona dezde 2020 liubá, maibé informasaun ida kona-ba taka totalmente eskola to’o 2022 ne’e ha’u la asina”, hateten Reitór UNTL, iha Gabinete Reitór nian, Díli (17/03).
Magnífiku Reitór hateten tan katak, parte universidade nian ho kualidade hanesan Reitór Universidade nian la asina karta refere no iha individu ruma mak publika.
“Ema ruma mak scan ha’u-nia asinatura hodi publika, maibé públiku tenki haree didiak karta refere, karta ne’e laiha númeru referénsia, no data emisaun nian, tan ne’e puramente hoax ka informasaun falsu, maibé audiénsia mak ho krítika hodi fiar informasaun ne’ebé loloos no ofisiál instituiasaun nian”, tenik Reitór.
Reitór mós konvidada sívitas akadémika tomak no publiku atu asesu informasaun ne’ebé ofisiál, liuhusi pájina Facebook no Website universidade nian .
Mai asesu ba UNTL nia pájina Facebook: https://www.facebook.com/untl.edu.tl no website: http://www.untl.edu.tl
Média UNTL 📝 : Miguel Gonçalves
Foto 📸 : Agostinho da Cruz e Silva
- Detalhes
- Escrito por Mateus Goncalves
- Visualizações: 8523
Visereitór ba Asuntu Akadémiku no Garantia Kualidade UNTL, Profesór Doutór Samuel Venâncio de Sousa Freitas
#TimorLeste #UNTL #VRAAGQ #COVID19 #COVID19TL 15 Marsu 2021
Universidade Nacional Timor Lorosa’e (UNTL) nia Visereitór ba Asuntu Akadémiku no Garantia Kualidade (VRAAGQ), Profesór Doutór Samuel Venâncio de Sousa Freitas, iha Kampus Sentrál UNTL nian (15/3), Díli, hateten katak estudante ne’ebé hela iha alojamentu (kost) atu hetan apoiu husi Ministériu Solidariedade Sosiál no Inklusaun (MSSI) tenki submete dokumentu sira liuhusi ida-idak nia Departamentu, liu husi via elektrónika.
“Durante implementasaun serka sanitária ita labele hasoru malu, parte UNTL nian hetan indikasaun katak estudante balun haruka direta sira-nia aplikasaun ba Ministériu Ensinu Superiór, Siénsia no Kultura (MESSK) entaun ita hadia fali nia prosesu, ha’u kontaktu ona Dekanu ho nia estrutura sira liuhusi WhatsApp atu identifika estudante ne’ebé hela iha kost atu hetan apoiu”, hatutan VRAAGQ.
Visereitór hatutan katak estudante sira hetan apoiu husi MSSI tanba durante Estadu Emerjénsia ba da-XI, serka sanitária ba munisípiu Díli, atividade akadémika prezensiál suspende no estudante estuda distánsia iha uma de’it.
“Ba períodu Estadu Emerjénsia EE-XI no serka sanitária iha munisípiu Díli nian ne’ebé suspende atividade akadémika prezensiál tomak mak MSSI servisu hamutuk ho MESSK hodi apoiu subsidiu ba estudante Ensinu Superiór sira iha Dili laran ne’ebé mak hela iha alojamentu (kost)”, tenik Profesór Samuel.
Visereitór mós husu ba Dekanu ho estrutura Fakuldade nian atu buka solusaun hamutuk liuhusi meiu komunikasaun elektróniku sira hodi identifika estudante ne’ebé hela iha kost atu hetan apoiu durante Estadu Emerjénsia.
Estudante UNTL ne’ebé priense ona formuláriu (https://tinyurl.com/4npjcr4m) bele kontaktu diretu ba Departamentu hodi submete dokumentu refere. Hafoin Fakuldade haruka dokumentu sira ba universidade, universidade hato’o rekapitulasaun dadus ba MESSK atu koordena prosesu subsídiu ho MSSI.
🔹 Bele download formuláriu refere iha ne'e: https://tinyurl.com/4npjcr4m
Média UNTL 📝 : Agostinho da Cruz e Silva
Foto 📸 : Agostinho da Cruz e Silva