- Detalhes
- Visualizações: 1289
#TimorLeste #UNTL #FCS-DCS #CI #COVID19#COVID19TL 04 Maiu 2022
Universidade Nacional Timor Lorosa’e (UNTL) nia estudante na’in 25 husi Departamentu Komunikasaun Sosiál (DCS), Fakuldade Siénsia Sosiál (FCS) partisipa iha kolókiu públiku ne’ebé promove husi Konsellu Imprensa ho tema “Jornalizmu iha Ameasa Dijitalizasaun” hodi komemora Loron Liberdade Imprensa, iha Salaun Delta Nova, Díli (03/05).
Elias da Costa, partisipante DCS nian, sente kontente tebes tanba bele partisipa iha kolókiu refere hodi komemora Loron Liberdade Imprensa iha Timor-Leste ne’ebé aserta iha loron 3 fulan Maiu.
“Ami partisipa no aproveita hanesan oportunidade ida atu eleva koñesimentu iha ameasa dijitalizasaun ba média no jornalista sira, nune'e mós atu hatudu profesionalizmu no kualidade iha hakerek notísia, hasai foto no halo filmajen hodi lori asesu ho lalais liuhusi Rede Sosiál,” realsa Elias.
Relasiona ho evente públiku ne’e, Prezidente Konsellu Imprensa, Sr. Virgilio Guterres, hateten komemorasaun Loron Liberdade Imprensa ne’e atu hanoin fila fali Loron Liberdade Imprensa iha mundu tomak nomós iha Timor-Leste.
“Eventu ne’e anuál, komemora loron mundiál mundu tomak selebra iha loron “3 Maiu” hanesan Loron Mundiál Liberdade Imprensa nian atu hanoin fila fali jornalista sira ne’ebé hetan ameasa no diskriminasaun, balun mate bainhira hala’o atividade jornalístiku”, dehan Prezidente.
Virgilio Guterres mós konvida timoroan hotu esforsu atu garanti liberdade imprensa no lori asesu informasaun ba sosiedade.
Orador ba kolókiu ne’e parte akadémika Profesora Dulce da Silva Martins (UNTL), STL-Media Sr. Salvador J. X. Soares, no Sosiedade Sivil (CEPAD) Sr. João Boavida.
Partisipa ba eventu ne’e maka husi parte Governu, Sosiedade Sivil, Prezidente Konsellu Imprensa no membru sira Asosiasaun Jornalista sira hanesan AJTL no TLPU, universitáriu sira husi UNTL, UNITAL, UNPAZ no jornalista inklui konvidadu sira.
Iha parte seluk relasiona ho komemorasaun loron Liberdade imprensa ne’e, DCS nia estudante sira mós halo marsa la’o ain husi Kampus Kaikoli to’o Palácio do Governo Eis-Casa Europa nia oin hodi presta omenjen ba Jornalista Roger East ne’ebé militár Indonézia oho no hamonu ba tasi laran no jornaslista sira mak mate iha luta Timor-Leste nian. 
Média UNTL 📝: Francisco Colo (estajiáriu)
Foto 📷 : Francisco Colo (estajiáriu)
- Detalhes
- Visualizações: 567
#TimorLeste #UNTL #VRAAGQ #COVID19#COVID19TL 04 Maiu 2022
Universidade Nacional Timor Lorosa’e (UNTL) nia Magnífiku Reitór, Profesór João Soares Martins, MPH, Ph.D, abertura Whorkshop Akadémiku Edisaun 2022 ne’ebé hala’o durante loron 3-4 Maiu 2022, hodi diskuti implementasaun Regulamentu Akadémiku no Padraun Kurríkulu Nasionál, iha Auditóriu FECT-Hera, Díli (03/04).
“Padraun Kurríkulu Nasionál ne’e, Ministériu Ensinu Superiór, Siénsia no Kultura (MESSK) adopta ECTS (European Credit Transfer System) ne’ebé ita aplika hanesan padraun kurríkulu universidade nian, desde 2014. Tanba ne’e iha tinan kotuk Ministériu reativa fali ekipa téknika ba revizaun nian, no padraun aprova ona husi Konsellu-Ministru iha 2022, razaun forte ba ita reve no ajusta tuir lalaok padraun nian” tenik Reitór. 
Magnífiku Reitór subliña katak, atu mellora kualidade universidade nasionál nian parte importante ida Regulamentu Akadémiku ne’ebé di’ak, atu implementa ho orientasaun ne’ebé klaru.
Iha fatin hanesan, Visereitór ba Asuntu Akadémiku no Garantia Kualidade (VRAAGQ), Profesór Doutór Samuel Venâncio de Sousa Freitas, hateten, Workshop Akadémiku refere nia foku prinsipál liu ba Regulamentu Akadémiku no artigu ne’ebé pertinente tebes.
“Ohin ita haree no diskute kona-ba Regulamentu Akadémiku, aleinde ne’e aproveita mós atu desimina informasaun ba iha nível internu kona-ba Kurríkulu Padraun Nasionál ne’ebé aprova ona iha dekretu lei, no ita hakarak hetan aseitasaun husi parte hotu, katak ba oin ita sei implementa bazeia ba indikasaun no dezisaun sira”, tenik VRAAGQ.
Workshop ne’e organiza husi Gabinete Visereitór ba Asuntu Akadémiku no Garantia Kualidade no hetan partisipasaun husi Visereitór, Proreitór, Diretór Jerál, Diretór Nasionál, Dekanu no Vise-Dekanu sira, Diretór Akadémiku sira, dosente, funsionáriu no konvidadu sira.
Média UNTL 📝: Altur Ramos
Foto 📷 : Laurindo da C. Gomes
- Detalhes
- Visualizações: 3091
#TimorLeste #UNTL #COVID19 #GMNTV #COVID19TL 04 Maiu 2022
Universidade Nacional Timor Lorosa’e (UNTL) nia dosente ne’ebé finaliza ona kursu Mestradu no Doutoramentu iha Universidade sira iha Portugál 🇵🇹 no Brazil 🇧🇷, ohin ba fahe sira-nia esperiénsia estudu ba públiku liuhusi Programa Dadeer-Kmanek iha Studio Grupu Media Nacional Televizaun (GMNTV) nian, Díli (3/05).
Objetivu husi dosentesira partilla esperiénsia ne’e, iha ámbitu komemorasaun Loron Mundiál ba Língua Portuguesa no Loron Língua Portuguesa no Kultura iha Comunidade dos Países de Língua Portuguesa (CPLP) ne’ebé Timor-Leste mós sei komemora iha loron 5 Maiu 2022.
Partisipa fahe esperiénsia ne’e, Profesora Zulmira Ximenes, M.Sc, atuál Diretora Nasionál ba Dadus, Prosesu, Atribuisaun no Alokasaun Dosente no dosente husi Departamentu Enjeñaria Informátika (FECT), Profesór Romualdo Lopes da Cruz, atuál Dekanu Fakuldade Siénsia Ezata (FCE), Profesór José Adriano Marçal, atuál Visediretór Departamentu Agronomia (FAGRI) no Profesór Paulo Henriques husi Centro de Língua Portuguesa (CLP).
Média UNTL 📝 : Agostinho da Cruz e Silva
Foto 📷 : Agostinho da Cruz e Silva
- Detalhes
- Visualizações: 4832
#TimorLeste #UNTL #GABCEDU #COVID19 #COVID19TL 03 Maiu 2022
Universidade Nacional Timor Lorosa’e (UNTL) nia Diresaun Jerál Gabinete Sertifikasaun ba Dosente (GabCEDU) liuhusi Diresaun Nasional ba Dadus no Prosesu Atribuisaun Kréditu aplika sistema baze dadus ba dosente sira atu formaliza dadus dosente sira-nian.
Diretora Nasionál ba Dadus no Prosesu Atribuisaun Kréditu nian, Profesora Zulmira Ximenes da Costa hateten, objetivu husi kria baze dadus refere hanesan sistema apoiu desizaun ne’ebé kalkula akumulusaun kréditu dosente sira-nian, ne’ebé uniformiza husi GabCEDU.
“Objetivu husi uniformiza sistema husi Diresaun Nasionál Rekursu Umanu, sistema balu husi Diresaun Nasionál Informátika no Teknolojia nune’e GabCEDU nia sistema ne’ebé kria dadaun hodi halo kalkulasaun akumulasaun kréditu nian, atu utiliza ida de’it, sistema integradu ne’e mak HRIS (Human Resources Information System) dosente sira bele atualiza sira-nia informasaun utiliza “pasword no username”, tenik Diretora Zulmira. 
Diretora hatutan, GabCEDU sei realiza semináriu ida kona-ba jestaun sistema informasaun ne’ebé bele uniformiza nune’e dosente sira bele fasil atu asesu nomós bele públika artigu, diploma no dokumentu relevante sira.
Média UNTL 📝 : Leonia de A. Da Costa
Foto 📷 : Denilson A. Barros
- Detalhes
- Visualizações: 717
#TimorLeste #UNTL #FAGRI #CFP #COVID19 #COVID19TL 30 Abril 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, perante Prezidente Komisaun Funsaun Públika (CFP), Profesór Faustino Cardoso, fó pose ba Dekanu Fakuldade Agrikultura, Profesór Vicente de Paulo Correia, Ph.D, ba períodu 2022-2026, iha Auditóriu Liceu UNTL nian, Díli (29/04).
Iha serimónia ne’e, Magnífiku Reitór, fó parabéns ba Dekanu Eleitu tanba bele simu knaar ne’e hodi tau lidera FAGRI no esperansa sei kontribui di’ak liután ba Fakuldade Agrikultura universidade nasionál nian.
“Ohin Dekanu foun simu ona pose, ita hato’o parabéns tanba simu ona knaar ida ne’e hodi kontribui ba mudansa Fakuldade nian no espera katak ho estrutura foun bele kontribui di’ak liután no bele koopera ho Dekanu sesante hodi kontinua planu sira ne’ebé Dekanu sesante la konsege realiza”, dehan Reitór.
Iha diskursu Dekanu nian Profesór Vicente de Paulo Correia, Ph.D agradese ba estrutura Fakuldade nian, ho konfiansa ne’ebé iha, hanesan Dekanu eleitu sei kontribui kapasidade tuir planu ne’ebé hatuur no kontinua implementa planu sira ne’ebé estrutura sesante trasa ona.
‘’Agradese ba Dekanu sesante ne’ebé halo ona servisu durante mandatu, ba responsabilidade ne’ebé ha’u simu ne’e konfiansa husi ita hotu, tanba ne’e presiza servisu hamutuk atu atinje planu sira no ha’u mós sei kontinua programa importante balun ne’ebé estrutura sesante seidauk implementa’’, hatutan Dekanu.
Dekanu sesante, Profesór Carlito de Araújo M. Code Ph.D, hatete, atividade lubuk mak konsege hala’o ona iha ninia mandatu liga ba asuntu akadémika, dezenvolvimentu edifísiu iha Hera, estabelese departamentu foun, no hametin kooperasaun sira.
“Ha’u hanesan dekanu sesante sei akompaña nafatin Dekanu foun atu kontinua hala’o mós programa anteriór sira, hanesan edifísiu foun iha Hera, departamentu foun ne’ebé presiza halo preparasaun hodi simu estudante iha tinan 2023 no kontinua hametin kooperasaun ne’ebé iha, di’ak liután ba oin” tenik.
Partisipa husi Prezidente CFP, Profesór Faustino Cardoso Gomes, Ph.D, membru Konsellu Jerál Me. Guilhermina Marçal, Visereitór, Proreitór, Amu Kapelaun Pe. Nivio Lebre Correia, Fdcc, Diretór Jerál, Diretór Nasional, Diretór Departamentu, Funsionáriu, Dosente, Estudante no konvidadu sira.
Média UNTL 📝 : Leonia de A. Da Costa
Foto 📷 : Denilson A. Barros