- Detalhes
- Escrito por Mateus Goncalves
- Visualizações: 547
Universidade Nacional Timor Lorosa’e (UNTL) liuhusi Proreitoria ba Asuntu Informatizasaun Transformasaun Dijitál no Inovasaun (PRAITDI) nia Departamentu Sistema Informasaun (DSI) sosializa Sistema Informasaun Akadémika (SIA) ba estudante Faculdade de Direito (FADIR) sira, iha salaun-enkontru English Language Center (ELC), Liceu (21/11).
Iha entrevista Xefe Departamentu Sistema Informasaun Josefa Maria do Rosário Vila Nova hatete, sosializasaun ne'e hodi fahe koñesimentu ba estudante sira husi Faculdade de Direito kona-ba oinsá utiliza plataforma digital iha Sistema Informasaun Akadémika nian.
“Objetivu husi formasaun ne’e, atu estudante sira iha koñesimentu kona-ba utiliza Plataforma digital iha sira-nia portal rasik, liu-liu atu hatene kona-ba biografia estudante ida-idak nian no asesu ba oráriu kada dosente nian ne’ebé atu hanorin nomós mapamentu, plataforma sistema digital ne’e, iha nia icon ou menu barak loos entaun presiza fó koñesimentu ba sira atu komprende didi’ak hodi utiliza sistema ne’e, hodi fasilita estudante sira iha prosesu estudu nian”, dehan nia.
Xefe ne’e akresenta liutan katak, tuir planu sei implementa Sistema Plataforma digital ne’e iha tinan oin ba Faculdade tolu uluk mak hanesan Faculdade de Filosofia, Faculdade de Agricultura no Faculdade de Direito.
Formasaun ne’e partilla husi Proreitór ba Asuntu Informatizasaun, Transformasaun Dijitál no Inovasaun (PRAITDI) Prof. Frederico Soares Cabral, Diretora Nasionál Informasaun no Teknolojia (DNIT) Sra. Adelaide Maria Filipa da Cunha ho ekipa no partisipa husi estudante sira.
#TimorLeste #UNTL #PRAITDI #FADIR #DNTI 21 Novembru 2023
Média UNTL 📝: Mario J. Martins (estajiáriu), Altur Ramos
Foto 📷: Mario J. Martins (estajiáriu)
- Detalhes
- Escrito por Mateus Goncalves
- Visualizações: 410
Universidade Nacional Timor Lorosa’e (UNTL) nia Visereitór ba Asuntu Pós-Graduasaun no Peskiza Profesór Afonso de Almeida, Ph.D reprezenta Magnífiku Reitór simu vizita ofisiál dahuluk husi Embaxadór United Arab Emirates (UAE) iha Indonézia Mr. Abdulla Salem AlDhaheri ho nia ekipa, iha Sala-Videokonferénsia UNTL nian, Díli (20/11).
Objetivu husi vizita ne’e, embaxadór halo tuir kompromísiu ne’ebé UEA asina ona ho Prezidenti Repúblika kona-ba Fraternidade Umanu, atu haree liu ba aspetu edukasaun nian. Aliende ne’e partilla mós programa sira ne’ebé UEA halo iha Indonézia liliu kona-ba enerjia renovável, nune’e posibilidade atu implementa mós iha Timor-Leste.
Partisipa husi Diretór Sentru Formasaun Avansada (CFA) Profesor Apolinario Magno, estudante sira no ekipa husi UEA.
#TimorLeste #UNTL #UAEEmbassyinJakarta 20 Novembru 2023
Média UNTL 📝: Altur Ramos
Foto 📷: Altur Ramos
- Detalhes
- Escrito por Mateus Goncalves
- Visualizações: 452
Universidade Nacional Timor Lorosa’e (UNTL) liuhusi Proreitoria ba Asuntu Provedoria no Akonsellamentu (PRAPA) hala’o misa agradesimentu, hodi selebra dies natalis (aniversáriu) UNTL nian ba dala XXIII, ne'ebé prezide husi Amu Kapelaun, Padre Nívio Lebre Correia, Fdcc, no ko-selebrante Padre Aniceto Maia da Costa, iha Kapela São João Paulo II, Kampus Hera, Díli (17/11).
Iha omilia Padre Aniceto husu ba Sívitas Akadémika tomak atu buka aprende nafatin hodi kontribui ba nasaun liuhusi idaidak nia knaar iha UNTL, tanba ne'e agradese ba Maromak ba ezisténsia universidade nian (2000-2023).
“Ita iha razaun forte atu agradese ba Maromak, saida mak ita halo iha mundu ne'e, mai husi kbiit Maromak nian, tanba ne'e husu ba sivitas tomak tenke buka aprende nafatin hodi tulun ita-nia nasaun liuhusi knaar ne'ebé hetan husi UNTL", dehan Padre Aniceto.
Misa agradecimentu ne'e partisipa husi Magnífiku Reitór, Profesór dr. João Soares Martins, MPH, Ph.D, ho nia estrutura, Dosente, Funsionáriu, estudante no konvidadu sira.
#TimorLeste #UNTL #PRAPA 17 Novembru 2023
Média UNTL 📝: Leonia de A. da Costa
Foto 📷: Leonia de A. da Costa
- Detalhes
- Escrito por Mateus Goncalves
- Visualizações: 387
Universidade Nacional Timor Lorosa’e (UNTL) liuhusi Komisaun Organizadora realiza semináriu nível universitáriu ho tema “O Papel da Universidade no Processo do Desenvolvimento do Capital Humano Orientada ao Campo de Trabalho Conforme no Plano Estratégico Desenvolvimento Nacional” hodi komemora Dies Natalis UNTL ba dala XXIII iha auditóriu FECT nian, Hera (16/11).
Iha diskursu Magnífiku Reitor UNTL agradese ba Reitór universidade sira ne’ebé partisipa atu bele eleva Ensinu Superiór diak liu, hodi lori nasaun nee ba oin ho diak no promove kooperasaun diak iha rai-laran.
“Ha’u hanoin ita tenki servisu makas liutan dezenvolve rai ida-ne’e, liuliu setór agrikultura hodi hadia dezenvolvimentu no halo kolaborasaun diak ho universidade sira hodi eleva kualidade edukasaun iha Timor-Leste”, dehan Reitór.
Iha fatin hanesan Ministru Ensinu Superior, Siénsia no Kultura (MESSK) S.E. José Honório da Costa Pereira Jerónimo, hato’o parabéns ba UNTL ba existénsia tinan 23 no fó ona kontribuisaun ba dezenvolvimentu nasionál no bele haree kontribuisaun no dedikasaun profesór ba estudante sira.
“Ha’u fó parabéns ba UNTL ba 23 anos ezistensia ne’ebé fó ona kontribuisaun lubuk ida ba dezenvolvimentu nasional. Agora iha IX Governu konstituisional Ita hakarak apoiu mos universidade privadu sira atu Timoroan sira hotu bele asesu ba edukasaun ne’e ho diak”, dehan MESSK.
Semináriu ne’e partisipa husi Magnífiku Reitór husi universidade sira hanesan DIT, UNPAZ, UCT, IOB no estrutura universidade nian, Visereitór, Proreitór, Dekanu, Dosente, Funsionáriu, Estudantes no konvidadus sira.
#TimorLeste #UNTL # DIT#UNPAZ#UCT# IOB 20 Novembru 2023
Média UNTL 📝: Laurindo da Cruz Gomes
Foto 📷: Mario Joni (estajiáriu)
- Detalhes
- Escrito por Mateus Goncalves
- Visualizações: 464
Universidade Nacional Timor Lorosa'e, (UNTL) nia Faculdade de Agricultura (FAGRI) hala’o Judisium ba dala XXIX ba finalista na’in atus ida limanulu resin lima (155) ho tema “Fini ba Futuru”, iha Auditóriu FECT Hera, Díli (11/10).
Dekanu FAGRI nian, Profesór Vicente de Paulo Correia hato’o parabens ba finalista sira, tanba ho esforsu no pasiensia bele konklui ona estudu, agradese mós ba konfiansa inan-aman no família sira, tanba bele fó konfiansa ba UNTL.
“Ami hakarak hato’o parabéns ba finalista sira hotu, tanba ho imi-nia pasiénsia no esforsu maka’as mak ohin, imi rasik konklui ona estudu ida ne’e, no ami mós hakarak agradese ba inan, aman no familia sira tanba fó ona konfiansa mai UNTL hodi haruka sira nia oan mai hala’o estudu iha UNTL to’o ohin sira remata ona.
Husu mos ba governu atu tau importansia ba setór agrikultura iha Timor-Leste, nune’e bele hasa’e produsaun iha rai laran hodi kontribui ba ekonomia iha Timor-Leste”, dehan Dekanu.
Iha fatin hanesan, Ministru Ensinu Superior, Siénsia no Kultura (MESSK), S.E. José Honorio da Costa Pereira Jerónimo hatete, governu iha ona planu hodi fó importansia ba área sira hotu, tanba ne’e sei iha prosesu diskusaun nian, tanba ne’e parabéns ba finalista sira hotu.
“Parabéns ba alin sira hotu, ohin ha’u haree estudante Kursu Peskas no Siénsia Mariñabnian lubuk ida mak judisium hotu, 2026 ita hanoin ona atu harii peska no mariña iha Timor no ami mós deskuti ona iha fundu kapital umanu, oinsá haruka joven sira ba estuda iha mestradu” dehan Ministru.
Reprezentante finalista, Zevancio Fernandes hatete, UNTL hatudu responsabilidade moral hodi produs rekursu umanu sira ne’e ho kualidade no iha kompetensia sai valór umanidade nu’udar siéntista foun nasaun nian ba futuru.
“Ami hotu hakarak agradese ba apoiu tomak husi parte hotu-hotu, no agradese mós UNTL liuhusi FAGRI hatudu ona responsabilidade moral hodi prodús rekursu ne’ebé ho kualidade no iha valór umanidade nu’udar sientista foun ba nasaun ida ne’e nia futuru, tanba husu ita hotu atu hola responsabilidade hodi kontribui ba nasaun ida ne’e” dehan Zevancio.
Totál finalista hamutuk na'in 155, kompostu husi Departamentu Agronomia (30), Departamentu Agro Sosio Ekonomia (24), Departamentu Saude Animal (52), Departamentu Pekuaria (35), Departamentu Peskas Siensia e Marinha (14).
Partisipa iha eventu ne’e, Dekanu Fakuldade Enjeñaria Siénsia no Teknolojia, Profesór Profesór Adalfredo G. da Silva Ximenes, estrutura FAGRI, Dosente, estudante, inan-aman no konvidadu sira.
#TimorLeste #UNTL #FAGRI #FECT #MESSK 14 Novembru 2023
Média UNTL 📝: Leonia de A. da Costa
Foto 📷: Leonia de A. da Costa