Detalhes

Escrito por Mateus Goncalves

Publicado em 02 setembro 2020

Atualizado em 02 setembro 2020

Visualizações: 2057

#TimorLeste #UNTL #FCE 1 Setembru 2020

Universidade Nacional Timor Lorosa’e (UNTL), nia Fakuldade Siénsia Ezata (FCE) ne’ebé funda iha 2015, no iha 2020 marka istória Fakuldade nian liuhusi atribuisaun títulu akadémiku ho nível lisensiatura 🎓 ba estudante na’in haat liuhusi serimónia judisium ne’ebé hala’o iha Salaun Ian Martin, INFORDEPE, Balide Díli (28/8).

Estudante na’in haat ne’e maka dahuluk konsege alkansa rekizitu hotu graduasaun nian, hanesan 👨🔬 Wilibrodus Usfinit, 👩🔬 Joana Ximenes Belo, 👩🔬 Claudina Angela Pereira no 👩🔬 Avenancia Tavares Belo de Carvalho. Sira na’in haat ho abilitasaun iha Siénsia Matemátika, Kímika, Físika inklui domíniu iha dalen portugés.

Proreitór ba Asuntu Akadémiku (PRAAK), Profesór Miguel Maia dos Santos, hateten katak, universidade sente onradu no felisita susesu estrutura tomak Fakuldade nian tanba konsege prodús graduadu na’in haat ba Timor-Leste.

“Universidade sente onra ida bele partsisipa hodi fó parabéns ba estrutura tomak Fakuldade nian, ne’ebé lidera husi Profesór Doutór Samuel Venancio Freitas no dezeja kualifikadu sira hodi prontu sai sujeitu ba dezenvolvimentu nasionál nomós sai sujeitu ba edukasaun iha área siénsia ezata”, tenik Profesór Maia.

Iha fatin hanesan Vise-Dekanu Asuntu Akadémiku FCE nian, Profesór Romualdo Lopes da Cruz, ho konfiansa katak, liuhusi teoria no prátika laboratóriu ne’ebé estudante sira aprende iha FCE, natoon ona ba sira atu aplika iha sosiedade nia leet.

“Ami espera liuhusi teória no prátika laboratóriu ne’ebé sira aprende iha ne’e ba nível lisensiatura nian, natoon ona atu bele kontribui ba desenvolvimentu iha área indústria nian”, hatutan Professór Romualdo.

Entretantu, finalista Wilibrodus Usfinit hateten katak durante tinan lima aprende iha universidade nia prontu atu aplika siénsia liuhusi prátika iha sosiedade.

“Ho buat hotu ne’ebé mak hau aprende durante tinan lima ho koñesementu básiku ba siénsia no prátika, ho esperansa no deseju katak ho ami nia prezensa bele fó valor hodi eleva koñesimentu sosiedade sira ba iha siénsia Matemátika, Kímika no Fízika”, dehan Wilibrodus.

Serimónia judisium ba dahuluk iha FCE ne’e partisipa husi Proreitór ba Asuntu Akadémiku, Profesór Miguel Maia dos Santos, Dekanu FCE ho nia estrutura Fakuldade nian, Diretór Ezekutivu ANAAA nian, Profesór Doutór Edmundo Viegas, dosente, reprezentante familia, estudante no konvidadu sira.

Média UNTL 📝 : Zita Menezes (estajiária)
Foto 📷 : Jeraldino Magno (estajiáriu)no Arkivu FCE

Comment

Detalhes

Escrito por Mateus Goncalves

Publicado em 01 setembro 2020

Atualizado em 01 setembro 2020

Visualizações: 1224

#TimorLeste #UNTL #MESSK 28 Agostu 2020

Magnífiku Reitór Universidade Nacional Timor Lorosa’e (UNTL) nian, Profesór Doutór Francisco Miguel Martins, partisipa iha reuniaun kona-ba proposta ba kriasaun husi komisaun interministeriál ida ba Kriasaun Laboratóriu Nasional ba Enjeñaria, neebé organiza husi Ministru Ensinu Superiór, Siénsia no Kultura (MESSK), S.E. Profesór Longuinhos dos Santos, iha Sala-Reuniaun MESSK, Díli (28-08).

 

Objetivu husi reuniaun nee, MESSK konvida Universidade Nasionál no Institutu Nasionál Siénsias i Teknologia (INCT) hodi rona ideia no sujestaun bazeia ba karta númeru 34/GVPM-MPO/VIII/2020 husi S.Exa. Vise-Primeiru-Ministru i Ministru Planu no Ordenamentu ho asuntu Proposta ba kriasaun husi komisaun interministeráal ida ba kriasaun Laboratóriu Nasional ba Enjeñaria.

 

Iha reuniaun ne’e, Reitór UNTL hateten katak, Fakuldade Enjeñaria Siénsia no Teknologia (FEST) iha ona laboratóriu ne’ebé kompletu , hanesan laboratóriu ba Enjeñaria Mekánika, Enjeñaria Elektrónika no Elétrika no Enjeñaria Sivíl.

 

Laboratóriu Enjeñaria UNTL iha ona, presiza de’it kolaborasaun no servisu hamutuk entre Ministériu relevante sira ho Instituisaun Públika Estadu nian hodi kompleta ekipamentu sira bazeia ba nesesidade neebé iha, tenik Reitór.

 

 

Aleinde laboratóriu enjeñeria iha okaziaun refere, Magnífiku Reitór informa mós ba MESSK katak universidade iha ona planu ba futuru atu kria ospitál universitáriu neebé sei kompleta mós ho laboratóriu.

 

Entertantu Ministru MESSK hateten katak, ideia no sujestaun sira ne’e importante no sei hatoo ba S.E. Vise-Primeiru-Ministru i Ministru Planu no Ordenamentu, S.E. José Maria dos Reis, liuliu laboratóriu UNTL nian, hodi kompleta liután ekipamentu sira inklui ospitál universitáriu.

 

 

Ita kompleta de’it laboratóriu neebé iha ona, hodi dezenvolve di’ak no kompleta liután liuhusi parseria ho UNTL, kria sistema triangle (Governu, Universitáriu no Indústria), inklui laboratóriu sira seluk, dehan Ministru Ensinu Superiór.

 

Partisipa iha reuniaun nee husi MESSK, Diretora Jerál Ensinu Superior, Dra. Maria Filomena Lay Guterres, no parte UNTL nian, Reitór UNTL, Proreitór ba Asuntu Dezenvolvimentu Institusionál, Profesór Leonel Madeira, Dekanu FEST, Profesór Doutór Ruben Jerónimo Freitas, no Prezidente INCT, Profesór Doutór José Cornélio Guterres no Vise Presidente INCT, Profesór Doutór Afonso de Almeida.

 

Média UNTL : Mateus Gonçalves

Foto : Mateus Gonçalves

Comment

Detalhes

Escrito por Mateus Goncalves

Publicado em 01 setembro 2020

Atualizado em 01 setembro 2020

Visualizações: 1443

#TimorLeste #UNTL 30 Agostu 2020

Mensajen ba Loron Konsulta Populár ba da-XXI hosi Magnífiku Reitór UNTL, Profesór Doutór Francisco Miguel Martins.

Iha loron 30 agostu 1999, Timoroan sira vota ba ita hotu-hotu nia liberdade ne’ebe ohin loron ita uzufrui hela.

 

Ho pregu, Timoroan sira tu’u buletin-votu atu hili ita-nia dalan rasik, atu kore-a’an husi inimigo, hodi ita bele dezenvolve ita-nia nasaun soberana, Rai Doben Timor-Leste.

21 tinan liu tiha ona, buat barak ita konsege alkansa ona.

 

Ba oin, nasaun nia destinu iha imi-nia, estudante no joven Timoroan sira, nia liman no neon.

 

Estuda ba, aprende ba, ho dilijénsia no kompromisu, hodi hari’i nasaun ne'ebé imi hakarak ba imi nia a’an no ba imi nia oan-jerasaun futura sira.

Rai lulik no povu aten-brani Timoroan, ita nia nasaun 21 anos soberanu ona, maske buat barak sei presiza halo, no dalan sei naruk, Universidade Nacional Timor Lorosa'e prontu atu servi nafatin.

Viva Timor-Leste ,

Viva UNTL ,

Parabéns Povu Timoroan .

Comment

Detalhes

Escrito por Mateus Goncalves

Publicado em 28 agosto 2020

Atualizado em 28 agosto 2020

Visualizações: 1416

#TimorLeste #UNTL #FCS 27 Agostu 2020

Universidade Nasional Timor Lorosa’e (UNTL) nia Magnífiku Reitór, Profesór Doutór Francisco Miguel Martins, apresia ho kolaborasaun PNTL nian ne’ebé partilla informasaun ba estudante sira, iha kampus Kaikoli UNTL, Díli (26/08), atu asegura estabilidade no garante paz iha Munisípio Díli.

 

Reitór UNTL nian hateten katak, parte Polísia Nasional Timor- Leste (PNTL), halo vizita refere liuhusi programa “Polísia ba Kampus” tanba hahun ba konkordánsia no kolaborasaun entre instituisaun rua.

 

“Programa Polísia ba Kampus ne’e, ba dahuluk implementa iha Fakuldade Siénsia Sosiál no sei hala’o mós iha Fakuldade seluk universidade nasionál nian, hodi transmite kona-ba tráfiku, rodoviáriu, polísia komunitária i polísia sientífika, atu lori estudante atu hatene kontribui ba paz no estabilidade iha suku to’o bairu”, dehan Reitór.

 

Entretantu Komandante PNTL Munisípiu Díli, Superintendente-Xefe Sr. Henrique da Costa, hateten programa polísia ba kampus ho objetivu atu sensibiliza kapasidade estudante sira-nian kona-ba lei, tránzitu, investigasaun kriminál, no polísiamentu komunitária.

 

 

“PNTL labele servisu mesak, tanba ne’e ho métodu aproximasaun liuhusi vizita kampus bele hato’o mensajen paz no estabilidade nian ba ema hotu, liuliu universitáriu sira atu nune’e sira mós bele kontribui ba konkretiza mehi ba transforma Díli sai fatin ida hakmatek”, hatutan Superintendente-Xefe Sr. Henrique .

 

Iha fatin hanesan, partisipante Simão Maria Pereira hateten katak sensibilizasaun refere interesante tebes atu komprende sinais tranzitu no atu bele hases-an husi dezastre.

“Sensibilizasaun “Polísia ba Kampus” ida ne’e mos bele muda kuñesimentu jovem nian hodi asegura an no komunidade husi konflitu”, tenik estudante.

 

 

Partisipa iha eventu ne’e Dekanu Fakuldade Fakuldade Siénsia Sosiál, Mestre Camilo Ximenes Almeida ho nia estrutura, dosente, estudante no membru polísia, inklui konvidadu sira.

 

Média : Geraldino P. Magno (estajiáriu), Jacob (estajiáriu).

Foto : Jacob (estajiáriu).

Comment