- Detalhes
- Escrito por Mateus Goncalves
- Visualizações: 5577
#TimorLeste #UNTL #EUintheworld #EUinTimor #GCHumanRights #GCAsiaPacific #HumanRightsCenterUNTL 14 Agostu 2020
Universidade Nacional Timor Lorosa’e (UNTL) liuhusi reuniaun Konsellu Jestaun nian (15-07), aprova sílabus husi unidade kurríkular transversál foun “Direitu-Umanu no Demokratizasaun”, ne'ebé Sentru Direitu-Umanu (SDU) propoin nu'udar dixiplina obrigatóriu iha programa lisensiatura Universidade Nasionál nian 🎓, atu implementa bainhira UNTL halo prosesu revizaun kurrikulár, iha tempu badak tuir mai.
“Ekipa SDU nian ho orgullu sei fasilita unidade kurríkular transversál foun kona-ba direitu-umanu no demokratizasaun nune’e estudante sira bele komprende konseitu xave direitu-umanu nian, no mós kona-ba istória, instituisaun no mekanizmu protesaun internasionál i rejionál relasiona ho direitu-umanu” hateten Jestór Projetu Dezenvolvimentu Edukasaun Direitus Umanus & Peskija iha UNTL nian, Sr. Adriano Remiddi, iha Kampus Kaikoli.
Sr. Remiddi salienta tan katak susesu ne’e, rezultadu diretu husi projetu kapasitasaun ne’ebé Global Campus of Human Rights implementa, dezde 2019, iha UNTL ho finansiamentu husi Uniaun Europeia 🇪🇺, hodi estabelese SDU UNTL nian. Projetu refere hetan apoiu husi Programa Azia-Pasífiku Global Campus nian, ne'ebé lidera husi Universidade Mahidol, Tailándia 🇹🇭, no mós apoiu husi Delegasaun Uniaun Europeia iha Timor-Leste 🇪🇺 🇹🇱.
Entretantu, Proreitór ba Asuntu Akadémika UNTL nian, Profesór Miguel Maia dos Santos, hateten katak, iha tinan akadémiku 2021, konteúdu balun husi unidade kurríkular transversál foun “Direitu-Umanu no Demokratizasaun” sei integra iha matéria transversál ne'ebé eziste ona. Bainhira UNTL halo prosesu revizaun kurrikulár, dixiplina foun ne’e bele integra iha planu kurrikulár kursu lisensiatura nian, nu’udar unidade kurríkular transversal autónomu.
“Matéria refere hola parte ba unidade kurrikulár transversál hahú tinan oin (2021). Tanba ne’e ami koordena ona ho Diretora Dixiplina Transversál nian hodi haree dixiplina ida ne’ebé mak ita bele haketak no tau hanesan prioridade, no tuir planu sei integra ba dixiplina Étika Morál no Direitu-Umanu i Sidadania.”, tenik Profesór Maia.
Média UNTL 📝 : Miguel Gonçalves, Agostinho da Cruz e Silva
Foto 📷 : Miguel Gonçalves, Arkivu i SDU
- Detalhes
- Escrito por Mateus Goncalves
- Visualizações: 1400
- Detalhes
- Escrito por Mateus Goncalves
- Visualizações: 1471
#TimorLeste #UNTL #MOP 13 Agostu 2020
Universidade Nacional Timor Lorosa’e (UNTL) nia Magnífiku Reitór, Profesór Doutór Francisco Miguel Martins, halo sorumutuk ho Diretór Empreza Aitula Unipesoál. Lda nian, Sr. Silveiro Ferreira Maubere, ne’ebé responsável ba konstrusaun edifísiu rua, iha Kampus Sentrál no Fakuldade Ekonómia no Jestaun nian (FEJ), hodi ko’alia kona-ba progresu konstrusaun nian.
Reitór iha Sala Video-Konferénsia kampus sentral UNTL nian, Díli (12/08) hateten katak enkontru refere atu komunika ba malu kona-ba progresu konstrusaun nian hodi aselera ba oin.
“Haree ba progresu konstrusaun iha kampus sentrál ne’e rasik foin 26,34%, nune’e mós iha kampus FEJ nian 24,20%. Konstrusaun rua ne’e mak ita haree tarde liu, tanba ne’e konvida ita mai iha ne’e, atu buka nia solusaun hodi aselera nia progresu”, tenik Reitór.
Iha fatin hanesan, Diretór Kompañia Aitula rekoñese katak konstrusaun ba edifísiu tarde tamba traballadór parte tékniku na’in ne’en fila ba sira-nia rain seidauk mai fali maibé sei buka meiu atu aselera prosesu konstrusaun ne’e.
“Konstrusaun edifísiu rua ne’e ami rekoñese tarde duni, tanba traballadór nain ne’en husi estranjeiru seidauk fila mai tanba ita enfrenta hela Estadu Emenjénsia liga ho COVID-19, maibé agora ba oin ami sei buka meiu hodi halais kontrusaun ne’e”, tenik Diretór Maubere.
Enkontru ne’e partisipa husi Proreitór ba Asuntu Dezevolvimentu Institusionál, Profesór Leonel Madeira, ho nia ekipa, Diretór Nasional Aprovisionamentu, Sr. Afonso Lopes, representante husi Ministériu Obras Públika nian, Sr. Domingos Sequeira ho Sr. Octavio Pereira, no enjeñeiru no ekipa Aitula nian.
Média UNTL 📝 : Agostinho da Cruz e Silva
Foto 📷 : Agostinho da Cruz e Silva / João Bosco Alves (estajiáriu)
- Detalhes
- Escrito por Mateus Goncalves
- Visualizações: 1359
#TimorLeste #UNTL 13 Agostu 2020
Universidade Nacional Timor Lorosa’e (UNTL) nia Magnífiku Reitór, Profesór Doutór Francisco Miguel Martins, ho nia estrutura simu proposta husi reprezentante komunidade Munisípiu Baucau nian, Sr. José Viegas, ho nia ekipa ne’ebé husu atu loke ramu universidade nasionál nian iha parte leste.
Hafoin simu tiha proposta, iha Kampus Sentrál UNTL nian, Díli, Reitór hateten katak universidade ho orgullu simu proposta refere, no pasu tuir mai sei ba aprezenta iha Konsellu Jestaun UNTL nian hodi diskute konteúdu dokumentu nian antes aprova.
“ Bainhira hetan ona aprovasaun, UNTL sei harii ekipa ida, hodi tun ba baze atu halo enkontru ho Prezidenti Munisípiu, Sr. António Augusto Guterres, no proponente sira inklui komunidade rasik bazeia ba dokumentu ne’ebé hato’o, inklui mós estudu viabilidade”, hateten Reitór UNTL.
Entretantu reprezentante komunidade Baucau nian, Sr. José Viegas, hateten katak, Universidade Nasionál to’o ona tempu hodi hakbesik liután ba komunidade.
“UNTL hanesan sentru kriasaun, difuzaun no promosaun kultura, siénsia no teknolojia, artikulasaun estudu no investigasaun, ho modu atu aumenta dezenvolvimentu umanu, nu’udar fatór estratéjiku ba dezenvolvimentu Timor-Leste”, dehan José Viegas.
Partisipa iha entrega proposta ne’e husi parte UNTL nian, Proreitór Asuntu Estudantíl, Profesór Zeferino Viegas Tilman, Diretór-Jerál Asuntu Akadémiku, Sr. Armindo Leto Fátima, Diretór Nasionál Rekursu Umanu, Sr. Agostinho Quelo, ekipa alumni-UNTIM, intelektual no reprezentante komunidade Baucau.
Média UNTL 📝 : Mateus Gonçalves
Foto 📷 : Mateus Gonçalves
- Detalhes
- Escrito por Mateus Goncalves
- Visualizações: 2186
Diretór Ezekutivu Nasionál Compact Development Team Timor-Leste (CDT-TL) nian, Embaixador Constâncio da Conceição Pinto kaer liman ho Magnífiku UNTL Reitór, Prof. Doutór Francisco Miguel Martins
#TimorLeste #UNTL #PCM #CDT-TL 13 Agostu 2020
Universidade Nacional Timor Lorosa’e (UNTL) nia Magnífiku Reitór, Prof. Doutór Francisco Miguel Martins, reuniaun ho Diretór Ezekutivu Nasionál Compact Development Team Timor-Leste (CDT-TL) nian, Embaixador Constâncio da Conceição Pinto, Vise-Diretór Ezekutivu, Sr. Mario D. Q. Carmo, ho ekipa husi CDT-TL nian, iha Kampus Sentral UNTL nian, Díli (11/7), hodi diskute Formasaun Profesór ba Nível Ensinu Sekundáriu.
Objetivu husi reuniaun refere atu rona pedidu CDT-TL nian hodi atualiza progresu dezenvolvimentu iha Timor-Leste, inklui mós estudu viabilidade ba projetu edukasaun, hodi estabelese Sentru Exelénsia ba Formasaun Nível Ensinu Sekundáriu nian.
Reitór UNTL nian hateten katak investimentu iha kualidade ba profesór nian importante hodi eleva kapasidade joven sira-nian atu simu estafeta prosesu dezenvolvimentu nasionál Timor-Leste nian.
UNTL iha kursu sira iha Fakuldade Edukasaun, Arte no Umanidade (FEAH) ne’ebé sai oferta formativa ba formasaun profesór sira-nian, tuir ita-nia mehi hakarak atinje kualidade umanu ne’ebé kualifikadu, hateten Magnífiku Reitór.
Entretantu Diretór Ezekutivu CDT-TL nian, Embaixador Constâncio da Conceição Pinto, hateten katak reuniaun ne’e hodi diskuti kona-ba projetu ne’ebé promove liu husi ajénsia husi Estadus Unidus Amérika 🇺🇸 “Millennium Challenge Corporation”, liuliu kona-ba projetu Edukasaun nian, iha sentru formasaun profesór ba ensinu sekundária nian.
“Hamutuk ho instituisaun ensinu superiór hanesan UNTL, neste momentu halo hela estudu balun inklui selesaun ba terrenu no konstrusaun edifísiu ba formasaun nian”, dehan Embaixador.
Sr. Constâncio mós hatutan tan katak CDT-TL hahú kooperasaun ho UNTL tanba hare’e ba papel importante iha área promosaun professor nian no asegura implementasaun ho sustentabilidade sentru exelénsia ne’e iha futuru.
Média UNTL 📝 : Mateus Gonçalves
Foto 📷 : Moizes do Rego