#TimorLeste #UNTL #MESSK 30 Abril 2020
Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins MPH, Ph.D, sorumutuk ho Ministru Ensinu Superior, Siénsia no Kultura (MESSK), S.E. Longuinhos dos Santos, iha salaun enkontru MESSK nian, Díli (29/04), hodi diskuti kona-ba Planu ba Graduasaun Virtuál.
“Ami informa ba Ministru kona-ba planu Universidade nian, atu implementa Graduasaun Virtuál ba estudante ne’ebé mak hatama pedidu mai universidade”, hatutan Reitór.
Reitór mós hatutan, iha reuniaun ko’alia mós kona-ba rejime kareira profesór UNTL nian ne’ebé durante ne’e seidauk iha progresu di’ak, tanba ne’e sei forma ekipa ida entre UNTL ho MESSK atu kolabora, hodi aselera progressu rejime kareira profesór sira nian iha futuru.
Ministru Ensinu Superior Siénsia no Kultura mós hateten, kona-ba graduasaun online parte ministériu sujere liu implementa mak graduasaun Virtual Puru (laiha partisipasaun direita husi graduandu sira).
“Horiseik parte UNTL aprezenta Graduasaun Virtual ho modelu rua, Graduasaun Virtual Puru ne’e signifika tenki uza online duni, no semi virtuál estudante ne’ebé iha valór di’ak liu bele mai prezensiál, entaun hau-nia sujestaun mak implementa graduasaun puru, tanba dadaun ne’e implementa hela Serka-Sanitária (SS) no Konfinamentu Obrigatóriu”, tenik Ministru MESSK.
Partisipa iha enkontru ne’e Visereitór, Proreitór, Dekanu Fakuldade sira, funsionáriu Gabinete Sertifikasaun Dosente UNTL, Diretora-Jerál Ensinu Superiór, no konvidadu sira.
Média UNTL : Agostinho da Cruz e Silva
Foto : Agostinho da Cruz e Silva