#TimorLeste #UNTL #FMCS #COVID19 #COVID19TL 30 Abril 2021
Universidade Nacional Timor Lorosa’e (UNTL), Fakuldade Medisina no Siénsia Saudé (FMCS) nia Dekanu, Profesór José Deonisio Ximenes, liuhusi via-telefónika (23/4), hateten katak nia Fakuldade la implementa estájiu no prátika ba estudante sira, sei adia ho baze ba aplikasaun Serka-Sanitária iha Díli.
“Fakuldade la realiza estájiu klínika no estájiu espesífiku, loloos ne’e ita hala’o ona iha fulan kotuk liubá, maibé ho situasaun atuál liuliu Serka-Sanitária iha Díli, entaun seidauk realiza tanba atu kumpre regra ne’ebé Minitériu Saúde nomós universidade fó sai”, tenik Dekanu FMCS.
Dekanu mós dezeja katak, situasaun atuál bele remata ho lalais, no sedu, di’ak liután atu estudante sira bele ba estájiu no prátika iha área idaidak ne’ebé fakuldade oferta.
“Ba estudante sira, husu atu tuir nafatin regra sira ne’ebé mak iha atu prevene an husi Surtu-COVID-19, no buka aprende mesak (autónomu) no aproveita ho meiu online sira, mentein kontatu ho profesór sira, liuliu iha matéria balun ne’ebé presiza”, hatutan Profesór Ximenes.
Média UNTL : Miguel Gonçalves
Foto : Miguel Gonçalves