#TimorLeste #UNTL #FECT #DEM #JICACADEFEST 29 Abríl 2021
Universidade Nacional Timor Lorosa’e (UNTL), Fakuldade Enjeñaria, Siénsia no Teknolojia (FECT), liuhusi Departamentu Enjeñaria Mekánika (DEM) nia laboratóriu bele halo teste ba material konstrusaun nian, no fasilita ona kompañia Shanghai Construction (SC) hodi halo teste ba sira nian materiál konstrusaun.
Diretór DEM nian, Profesór Eng. José M. Xavier, ST, M, liuhusi via telefónika, foin lalais ne’e hateten katak, kompañia sira rekoñese abilidade no fasilidade ne’ebé pretense ba laboratóriu DEM nian hodi bele fasilita sira.
“Ita orgullu, tanba kompañia sira ne’e rekoñese ita-nia abilidade nomós fasilidade laboratóriu nian, ne’e hanesan pasu ida di’ak, atu bele promove ita-nia estudante sira ne’ebé remata iha UNTL sira mós koñese ona”, tenik Diretór DEM.
Profesór José mós hatutan, Departamentu ne’e nafatin kolabora di’ak ho kompañia sira, nune’e parte ida halo promosaun ba estudante sira bainhira remata estudu, iha kompaña sira ne’e bele koñese ona sira.
Responsável Laboratóriu nian, Eng. Valerio de S. Gama, hateten katak, fasilidade laboratóriu nian, hirak ne’e apoiu husi Ajénsia Internasionál JICA (Japan International Cooperation Agency), iha momentu halo konstrusaun ba edifísiu foun FECT nian.
“Atividade halo teste ba besi husi kompañia nia ne’e, ami hala’o komesa iha tinan kotuk dadaun ami simu kompañia besik sanulu (10) mak lori sira-nia amostra (sample) mai iha ne’e” tenik Profesór Valerio.
Profesór mós hatutan, dadaun maské iha hela Serka-Sanitária maibé karik iha kompañia balun hakarak atu halo teste material kontrusaun nian parte Departamentu prontu atu atende.
“Kompañia sira balun mak halo ona teste material, tanba iha Memorandum Entendimentu (MoU), atu uza ita-nia fasilidade, maibé di’ak liután mak bele hakbesik mai Departamentu, Fakuldade no Universidade atu hetan informasaun detalladu, enkuantu tékniku prontu atu atende”, hatutan.
Material ne’ebé uza ba halo teste mak, besi no dadaun ne’e Shanghai Construction mós foin lori meterial ba teste (besi) ho diametru hanesan 12, 13, 20, no 22 atu halo ba edifísiu foun Polísia Nacional Timor-Leste (PNTL) nian, no laboratóriu ne’e bele halo teste ba besi ho diametru 1 to’o 40 mm.
Média UNTL : Agostinho da Cruz e Silva
Foto : Agostinho da Cruz & Arquivu DEM