Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH, Ph.D simu vizita Vise-Ministru ba Asuntu Parlamentar no Negósiu Estranjeiru husi Japaun (VMAPNNE) S.E Masahiro Komura ne’ebé vizita Faculdade de Engenharia Ciência e Tecnologia (FECT) iha Hera, Díli (14/08).
Iha diskursu Magnífiku Reitór agradese ba Vise-Ministru Asuntu Parlamentar no Negósiu Estranjeiru husi Japaun nia prezensa, tanba bele haree direta kondisaun eskola no fasilidade sira ne’ebé oferese husi Governu Japaun liuhusi Japan International Cooperation Agency (JICA).
“Agradese ba S.E Vise-Ministru nia prezensa, espera katak liuhusi vizita ida-ne’e ita-nia kolaborasaun ne’e kontinua nafatin ba oin, hodi apoiu UNTL ba halo estudu komparativu iha Japaun nomós oferese bolsa ba estudante no dosente sira”, dehan Reitór.
Iha fatin hanesan Vise-Ministru ba Asuntu Parlamentar no Negósiu Estranjeiru Japaun S.E Masahiro Komura iha nia diskursu hateten, sente orgullu vizita iha FECT hodi haree direta programa husi apoiu sira durante ne’e.
“Orgullu tebes mai vizita FECT ne’ebé Japaun fó ona apoiu durante tinan ruanulu (20), desde Timor-Leste restaura nia independénsia. Espera katak graduandu sira husi FECT sira ne’ebé iha esperiénsia estuda iha Japaun sei sai forsa signifiakativu ba dezenvolvimentu Timor-Leste nian”, dehan Vise-Ministru.
Aleinde hasoru malu ho estrutura Fakuldade ho Dosente sira, Vise-Ministru Komura hala’o visita ba fasilisdade sira ne’ebé mak antes ne’e Governu Japaun apoiu liuhusi JICA iha Timor-Leste.
Iha vizita ne’e akompaña husi Embaxadór Japaun nia Sr. Tetsuya Kimura ho nia delegasaun, Proreitór ba Asuntu Koperasaun Profesór Tomé Xavier Jerónimo, Dekanu FECT ho nia estrutura, Dekanu FCS, Prof. Dr. Alarico da C. Ximenes, Dosente, Funsionáriu no estudante sira.
Média UNTL 
: Domingos Amaral
: Domingos AmaralFoto 
: Agustinho da Cruz
: Agustinho da Cruz