Universidade Nacional Timor Lorosa’e (UNTL) liuhusi Faculdade de Direito (FADIR) nia Dekanu Profesór José Tomás Alves, iha Kampus Sentrál, Díli (29/07), hatete iha FADIR implementa estájiu profisionál (EP) ba estudante finalista sira ne’ebé remata ona matéria Direitu Penal no Direitu Prosesuál Penál no ida-ne’e hetan mós inisiativa husi estudante sira mak hili instituisaun ne’ebé sira atu halo estájiu.
“FADIR implementa estájiu profisionál ba estudante finalista sira ne’ebé remata ona matéria Direitu Penál no Direitu Prosesuál Penál no sira rasik inisiativa ba buka instituisaun sira ne’ebé bele simu sira atu halo estájiu, hafoin FADIR fasilita karta rekomendasaun ba estudante sira”, dehan Dekanu ALves.
Dekanu hatutan, aleinde estágiu profisionál, FADIR nia estájiu servisu sosiál mak hanesan vizita ba instituisaun sira Setór Justisa nian hanesan Tribunál, ho objetivu atu hakle’an liután estudante sira-nia koñesimentu teóriku liuliu iha matéria direitu penál no direitu prosesuál penál ne’ebé sira hetan ona.
Estudante FADIR 5º ano, Rosalia Monica Moruc hatete, iha FADIR implementa estájiu profisionál ba estudante finalista ne’ebé remata matéria direitu penál no diretu prosesual penál entaun sira rasik inisiativa ba buka instituisaun sira ne’ebé bele simu hodi halo estájiu.
‘’Ami-nia estájiu profisionál ne’e aplika ba estudante sira ne’ebé foti ona matéria direitu penál no direitu prosesual penál.
Ami rasik iha inisiativa buka instituisaun sira hodi hala’o eatájiu. Aleinde ne’e, ami mós iha estájiu servisu sosiál ne’ebé mak ami ba vizita Tribunál sira iha Díli no munisípiu hodi haree ba servisu sira liuliu iha matéria prinsipál sira ne’ebé sai fundamentu ba futuru jurídiku’’, dehan Rosalia.
Média UNTL 
: Laurindo da Cruz Gomes
: Laurindo da Cruz GomesFoto 
: Laurindo da Cruz Gomes
: Laurindo da Cruz Gomes