Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins MPH, Ph.D ho Ministru Ensinu Superior, Siénsia no Kultura (MESSK) S.E. Ministru José Honorio da Costa Jerónimo halo lansamentu ba Ekipa Traballu ba Kampus Seguru hodi hasa'e koñesimentu komunidade akadémika nian hodi hapara asédiu seksuál iha universidade.
Reitór hatete, Ekipa Traballu ne'e importante tebes atu asegura joven feto sira bele seguru iha kampus no liuliu estudante feto sira bele konfortável komunika ho Ekipa Traballu Kampus Seguru.
"Ohin ita halo lansamentu ba Ekipa Traballu Kampus Seguru nian, tanba ekipa nia servisu importante tebes atu asegura joven feto sira bele seguru iha kampus no liuliu estudante feto sira bele konfortavel komunika ho Ekipa Traballu Kampus Seguru.
Ita mós iha Proreitora ba Asuntu Provedoria no Akonsellamentu bele atende estudante sira, no husu mós ba Dosente no ema hotu iha UNTL atu haree ita nia feton sira hanesan ita nia oan no servisu iha UNTL nudar ita nia familia, no evita labele halo asediu seksuál hasoru alin feto sira", Reitór dehan iha Auditóriu FCS, Kaikoli, Díli (14/08).
Iha fatin hanesan, Ministru MESSK nian, S.E. José Honorio da Costa Jerónimo hatete, lansamentu ba Ekipa Traballu Kampus Seguru ne'e importante tebes iha UNTL, tanba husi servisu sira ne'e bele prevene konflitu sira liuliu Asediu Seksuál.
"Kampus Seguru ne'e importante iha UNTL, tanba iha relasaun ho asédiu seksuál ne'ebé hetan apoiu husi UN Women no KOICA, tanba iha relasaun ho asediu seksuál, husi sira-nia servisu bele prevene konflitu sira", dehan Ministru José Honorio.
Governante ne’e mós husu ba dosente sira hala'o sira-nia knaar ho loloos no labele halo asédiu hasoru estudante sira, tenke respeitu malu iha instituisaun akadémiku sira.
Partisipa iha lansamentu ne'e, Visereitora ba Asuntu Estudantís nian, Sra. Lígia Tomás Correia, Proretora ba Asuntu Provedoria no Akonsellamentu, Sra. Teresa de Jesus Vaz Cabral, no konvidadu sira.
Média UNTL 
: Leonia de Araújo da Costa
: Leonia de Araújo da CostaFoto 
: Laurindo da Cruz Gomes
: Laurindo da Cruz Gomes