Universidade Nacional Timor Lorosa’e (UNTL) liuhusi Faculdade de Direito (FADIR) nia Prezidente Asosiasaun Estudante Akadémika Fakuldade, Cesar João M. Baptista eleitu ba Senadu Jerál Estudante nian ba Konsellu Jerál períodu 2024-2026.
Xefe Departamentu Estudantís Alumni no Empregabilidade (DEAE) Sr. Elvino Alves Correia kongratula estrutura ne’ebé eleitu hodi servisu hamutuk ho estrutura universidade nian, no atu bele lori preokupasaun estudante sira-nian iha kada fakuldade ba iha Universidade.
“Agradese ba senadu jerál sesante nia servisu kolaborasaun durante ne’e hodi atinje objetivu hodi melhora atividade estudante sira-nian.
Ita espera senadu foun ne’ebé eleitu sei lidera no bele kolabora atu servisu hamutuk, no ha’u fiar tinan rua mai ita sei kolabora di’ak atu atinje objetivu sira hodi haree mós atividade sira atu hasa’e kapasidade no koñesimentu estudante sira-nian’’, dehan Xefe Elvino, iha Sala-Videokonferénsia UNTL nian, Díli (22/07).
Senadu Jerál eleitu Cesar João M. Baptista agradese ba reprezentante senadu sira kada fakuldade ne’ebé fo fiar atu bele hala’o knar hanesan senadu jerál iha UNTL hodi representa estudante nia lian iha Konsellu Jerál universidade nian.
‘’Ha’u prontu kolabora ho parte universidade nian no estrutura sira hodi servisu hamutuk liuliu atu haree ba preokupasaun kolega estudante sira-nian iha prosesu aprendisajen nian.
Ha’u mós husu ba senadu sira hotu kada fakuldade atu bele koopera hamutuk hodi bele realiza atividade sira hotu ho diak’’, dehan Cesar.
Iha eleisaun ne’e kompostu husi Cesar João eleitu ba Senadu Jerál hodi reprezenta estudante iha Konsellu Jerál, Denilson Carlos X. Correia reprezentante estudante iha Konsellu Disiplinar, Arlindo Américo P. Rodrigues nu’udar membru Senadu Akadémiku.
Atividade ne’e organiza husi Gabinete Visereitoria ba Asuntu Estudantís nia Departamentu Estudantíl Alumni no Empregabilidade no partisipa husi senadu sira husi fakuldade 10 iha UNTL, inklui komisaun organizadora sira.
Média UNTL 
: Laurindo da Cruz Gomes
: Laurindo da Cruz GomesFoto 
: Laurindo da Cruz Gomes/Arkivu DEAE
: Laurindo da Cruz Gomes/Arkivu DEAE