Universidade Nacional Timor Lorosa’e (UNTL) liuhusi Faculdade de Turismo Artes Indústrias Criativas e Culturais (FTAICC), nia Dekanu Profesór Dr. Feliciano Quintas do Céu hamutuk ho estrutura fakuldade, partilla informasaun kona-ba matadalan estájiu nian, ba estudante atus ida lima (105), molok dezloka ba Ataúro.
Dekanu dehan, Estájiu Servisu Sosial (ESS) ne’e, ho kréditu 6 hanesan rekezitu ida ba estudante hotu, tanba estudante sira-ne’e termina ona unidade kurrikulár pursentu 85 no sira iha direitu hodi partisipa.
“Durante iha prosesu aprendizajen imi aprende ona materia barak, no imi iha ona koñesimentu, nune’e iha estájiu no servisu sosial ne’e imi bele aplika matenek iha sosiedade no espera katak husi estájiu ne’e imi bele hatudu imi-nia responsabilidade, lealdade no pasiénsia”, dehan Dekanu iha Kampus FEG, Díli (26/07).
Iha fatin hanesan Mestre Joaquim P. de Silveira nu’udar orientadór, hateten, durante tempu naruk, estudante sira aprende ona siénsia kona-ba turismu no to’o ona tempu mós atu estudante sira ba hamutuk ho komunidade.
”Imi-nia prezensa maka komunidade sira nia esperansa, katak imi sai hanesan mós matadalan no naroman ba komunidade sira no husu atu tane as almamater UNTL nian iha komunidade nia le’et.
Iha estájiu sosial ne’e imi sei fahe matenek ne’ebé iha ba komunidade sira, nune’e hodi desenvolve turismu di’ak liutan iha futuru”, tenik Orientadór.
Estudante sira sei dezloka ba postu administrativu Atauro durante fulan rua, hahú 30 Jullu to’o 30 Setembru. Estudante sira sei akompaña husi orientadór na’in-tolu: Mestre Joaquim P. de Silveira, Mestra Lígia Pinto Ornai no Mestre Jelino Soares.
Média UNTL : Mario J. Mendonça
Foto : Altur Ramos