Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH, Ph.D, ho reprezentante MESSK nian Diretora Jerál ba Ensinu Superior no Siénsia, Dra. Maria Filomena Lay Guterres, halo abertura ba III Semináriu Internasional ba kursu Formação Profesores e Ensino Pre-Escolar (FPEPE) ho tema “Educação de Infância em Timor-Leste Um Presente com Futuro”, iha Kampus Liceu, Díli (24/7).
Magnífiku Reitór hatete, eventu refere importante atu bele partilla esperiénsia no koñesimentu sira, relasiona ho métodu ensinu pre-eskolár nian, tanba hanorin labarik sira la fasil, hanesan hanorin ema boot, maibé ho esforsu no dedikasaun profesór sira-nian.
“III semináriu internasional ida-ne’e importante tebes, atu ita bele partilla esperiénsia no koñesimentu sira relasiona ho métodu ensinu pre-eskolar nian, tanba ita hanorin labarik sira la fasil hanesan hanorin ema boot, maibé ho ita nia esforsu no dedikasaun mak bele eduka estudante sira sai ema kualifikadu”, dehan Reitór.
Dekanu FEAH nian, Profesór Teodoro Soares hatete, edukasaun infantil ne’e importante tebes, tanba ne’e, liuhusi seminariu ne’e hanesan espasu di’ak, atu partilla no deskuti, espesialmente kona-ba edukasaun infánsia iha Timor-Leste.
“Ohin ita realiza III semináriu kona-ba edukasaun infánsia, tanba edukasaun infánsia importante, tanba ne’e presiza deskuti no partilla no rekolla jusestaun sira hodi mellora di’ak liu iha futuru”, tenik Dekanu.
Responsável Protokolu ba Pre-Eskolar husi Universidade do Minho, Profesór Dr. José Augusto Pacheco hatete, edukasaun infantíl iha mundu ohin loron, presiza eleva sistema edukativu ne’ebé kualidade.
“Edukasaun Pre-eskolár ida kualidade depende ba kualidade universidade nian atu forma ema profisional, tanba ne’e universidade ida ne’ebé la iha profesór ba formasaun pre-eskolár mak konsidera hanesan universidade ne’ebé la kompletu, tanba ne’e presiza duni formasaun pre-eskolar ne’e hodi servisu ba sosiedade”, dehan Dr. Pacheco.
Eventu refere organiza husi Departamento Formação Profesores e Ensino Pre-Escolar (FPEPE-FEAH) no apoiu husi husi Universidade do Minho Portugal durante loron rua (25-26) Jullu.
Partisipa husi reprezentante Ministériu Edukasaun, atual Diretór Diresaun Nacional Edukasaun Pre-Eskolar, Sr. Domingos Belo, Dekanu, Visedekanu, Diretór Jeral, Diretór Nacional, Profesór sira husi Universidade do Minho Portugal, Dosente, Konvidadu no Estudante sira.
Média UNTL 
: Leonia de Araújo da Costa
: Leonia de Araújo da CostaFoto 
: Leonia de Araújo da Costa
: Leonia de Araújo da Costa