Universidade Nacional Timor Lorosa'e (UNTL) nia estudante Ezalina Soares da Silva hatete, kursu mestradu iha área Políticas Públicas ne'e bele lori ema sai lideransa iha nia nasaun rasik hodi lidera instituisaun governu no setór privadu iha Timor-Leste.
"Ha'u sente orgullu tebes, tanba UNTL bele iha inisiativa kria kursu mestradu iha área Políticas Públicas nian, nune'e jerasaun foun sira bele iha mehi aas hodi sai lideransa iha ita-nia nasaun rasik iha futuru.
Liuhusi kursu ida-ne'e ajuda tebes ita hodi komprende kona-ba lalaok políticas públicas iha Timor-Leste nian" dehan estudante Ezalina hafoin partisipa iha abertura ba kursu mestradu iha PP, iha Auditóriu FCS, Caicoli, Díli (23/07).
Visereitór ba Asuntu Pós-Graduasaun no Peskiza nian, Profesór Afonso de Almeida, nu'udar mós responsável ba kursu mestradu refere hatete, kursu Políticas Públicas ne'e, importante tebes, tanba akumula área hotu.
"Kursu Políticas Públicas ne'e importante tebes, tanba akumula área hotu, maské estudante sira mai husi kursu oioin hanesan, Kontabilidade, Agrikultura, Saúde no seluk tan, maibé bele aprende no hariku koñesimentu, nune'e bele foti desizaun klaru bazeia ba evidénsia no dadus real iha sosiedade.
Ita hakarak loke kursu ida-ne'e hodi forma ita-nia rekursu umanu ba futuru, karik sira asumi kargu ruma, sira bele toma desizaun tuir dadus reál iha Timor-Leste", dehan Profesór Afonso.
Profesór Afonso hatutan, kritéria ba kandidatura mestradu sira, normalmente tenke iha diploma lisensiatura, no tuir kursu língua Portugueza durante fulan haat antes tuir aula, no dadaun ne'e totál estudante hamutuk ruanulu-resin lima (25) mak hahú aula no totál dosente hamutuk sunulu-resin lima (15) no sei hetan mós apoiu husi dosente sira husi universidade sira iha Portugal no Indonesia.
Média UNTL 
: Mario Jonio Mendonça
: Mario Jonio MendonçaFoto 
: Leonia de Araújo da Costa
: Leonia de Araújo da Costa