Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH,Ph.D, hatete, senadu-estudante foun ba mandatu tinan 2024-2026 sira tenke hatudu lideransa di’ak, komunikasaun di’ak, nomós tenke iha diskusaun barak, análiza barak, uza pensamentu krítiku ho kualidade, antes halo asaun ruma, nune’e bele sai ezemplár iha sosiedade.
“Ha’u hakarak felisita senadu jerál eleitu no sai mós reprezentante ba iha Konsellu Jerál no Konsellu disiplinar nian, ha’u nia mensajen ba mak, tenke hatudu lideransa ida di’ak, konsulta ho estrutura fakuldade to’o nivél universidade, inklui tenke diskusaun no análiza barak entre imi hotu.
Aleinde ne’e uza pensamentu krítiku ho kualidade, antes halo asaun ruma, nune’e ita bele hatudu edukasaun di’ak no sai ezemplár ba sosiedade”, dehan Reitór João iha Auditoriu FCS, Caicoli, Díli, (23/7) hafoin aprezentasaun Senadu Jerál Eleitu ho estrutura ba estrutura Universidade.
Iha fatin hanesan Visereitór Asuntu Akadémiku no Garantia Kualidade (VRAGK), Profesór Dr. Samuel Venâncio de Sousa Freitas hatete, senadu tenke uza hanoin krítiku, analítiku, kriativu, buka atu komprende siénsia ka asuntu sira ne’ebé relasionadu, nune’e bele tetu desizaun hodi bele kontribui ba UNTL nia di’ak iha futuru.
“Senadu nu’udar lideransa iha kada fakuldade, tanba ne’e tenke lidera estudante sira hotu, ha’u husu atu imi uza hanoin krítiku, analítiku, kriativu, buka atu komprende siénsia ka asuntu relasionadu sira, presiza tetu desizaun hodi kontribui ba exelensia UNTL nian iha futuru” dehan Vise Reitór VRAGK.
Iha eventu refere nu’udar diskusaun entre estrutura ho senadu sira, hodi partilla informasaun nesesáriu sira malu.
Partisipa husi Visereitora ba Asuntu Estudantís, Dra. Lígia Tomás Coreira, Proreitór ba Asuntu Inspesaun Auditoria no Kontrolu Kualidade nian, Profesór Rosalino Gomes, senadu sira husi kada fakuldade, asistente tékniku no funsionáriu administrasaun sira.
Média UNTL 
: Leonia de Araújo da Costa
: Leonia de Araújo da CostaFoto 
: Leonia de Araújo da Costa
: Leonia de Araújo da Costa