![452659264_122113368830385439_6434024343995646962_n.jpg](/images/452659264_122113368830385439_6434024343995646962_n.jpg)
Universidade Nacional Timor Lorosa’e (UNTL), nia Profesór Martinho Boromeo atuál Dekanu Faculdade de Filosofia Ciências Humanas (FFCH) hamutuk ho S.E Primeiru Ministru Kay Rala Xanana Gusmão halo lansamentu livru ho titlu Simone Weil: O Sofremento a Colonialização, e o Desenraizamento Um Olhar Sobre o Timor-Leste.
Liuhusi entrevista iha Salaun Semináriu Menor Senofa Balide, Díli (23/07), autór ba livru Profesór Martinho Boromeo hateten, sofrementu ne’e husi konseitu Filosofia, maibé reflete mós sofrementu mundu inklui Timor-Leste.
“Livru ne’e nia konseitu Filosofia, maibé refleta sofrementu mundu liu-liu Timor-Leste hafoin nasaun lubuk ida ukun ita ho nia modelu balu tinan barak no balun lakleur, nune’e husik hela buat balu ho termu dezenraizamentu hanesan buat ne’ebé ita kuda ema fokit ka foti fila-fali.
Preokupasaun no olhar sobre Timor-Leste hanesan ita bele dehan tranzisaun, tanba ita iha kultura no identidade, maibé mosu fali kultura foun hanesan krizi identidade língua, nune’e ita atu sai saida iha futuru”, dehan Profesór Martinho.
Profesór ne’e dehan, prosesu hakerek livru ne’e durante tinan tolu (3) no sei oferese ba Universidade sira no tau mós iha Biblioteka Xanana Reading Room, nune’e mós agradese ba S.E Primeiru-Ministru nia prezensa iha lansamentu livru ne’e.
Iha fatin hanesan S.E. Primeiru-Ministru Kay Rala Xanana Gusmão agradese ba Profesór Martinho, tanba bele hakerek ona livru ida kona-ba kolonializasaun no husu atu fahe mós ba universidade sira.
“Iha livru ne’e hakerek kona-ba kolonialismu, ne’e hanesan ezemplu no motivasaun di’ak ida ba estudante sira no timoroan hotu atu bele hatene hanoin no buka halo analiza, tanba buka hatene no komprende ne’e hatudu kbiit no rasiosinu ne’ebé kapas”, Dehan PM Xanana.
Partisipa husi Proreitora ba Asuntu Provedoria no Akonselamentu (PRAPA) Profesora Teresa de Jesus Vaz Cabral, Reitór Seminariu Menor Nosa Senhora de Fatima Balide Pe. Natalino da Costa Soares, Amu Kapelaun UNTL Pe. Nivio Coreia Lebre Fdcc, Dosente sira, Dosente FCS, esudante UNTL, ISFIT, seminarista husi SENOFA no funsionáriu no konvidadu sira.
Média UNTL
: Domingos Amaral
![📝](https://static.xx.fbcdn.net/images/emoji.php/v9/tcc/1/16/1f4dd.png)
Foto
: Denilson Amandio Barros
![📷](https://static.xx.fbcdn.net/images/emoji.php/v9/t5d/1/16/1f4f7.png)