Universidade Nacional Timor Lorosa’e (UNTL), Faculdade Economia e Gestão nia vise Dekanu ba Asuntu Akadémiku Profesór Dr. Ananias Barreto, iha Kampus FEG, Díli (24/07) hateten, estudante husi departamentu tolu hamutuk atus tolu limanulu (350) mak hala’o sira-nia Estájiu Servisu Sosial (ESS) iha munisípiu, Aileu, Ermera no Liquiça ho durasaun fulan rua.
“Faculdade Economia e Gestão kada tinan sempre halo programa Estájiu Servisu Sosial (ESS) ne’ebé kontempla iha kurríkulu fakuldade ne’e nian, tanba ne’e tinan ida sempre halo estájiu servisu sosial, FEG iha nia departamentu tolu Gestão, Ciência Economia no Contabilidade, dadaun ne’e estudante hamutuk atus tolu lima nolu mak hala’o hela sira-nia estájiu iha munisípiu tolu”, dehan Profesór Ananias.
Profesór ne’e mós dehan, estudante sira sei hala’o sira-nia estájiu servisu sosial ho durasaun fulan rua (2) hodi apoiu servisu autoridade lokal sira-nian, maibé bazeia ba sira-nia programa.
“Estudante sira sei hala’o sira-nia estájiu durante fulan rua (2) hahú husi 18 Jullu 2024 no sei remata iha 18 Setembru. Durante sira-nia estájiu sei apoiu servisu ho komunidade no autoridade lokál sira, maibé depende ba autoridade sira propoin ba estudante sira saida mak sira presiza apoiu husi estudante sira”, Tenik Profesór.
Estudante sira ne’ebé hala’o estájiu iha munisípiu tolu ne’e fahe ba grupu sanolu resin rua (12) hanesan Aileu iha grupu haat (4) Ermera grupu haat no Liquiça grupu haat (4).
