Universidade Nacional Timor Lorosa'e (UNTL) liuhusi Faculdade de Ciências Sosiais (FCS), nia estudante Cesaltino de Jesus ho nia pakote eleitu ba estrutura AAEF (Asosiasaun Akadémika Estudantíl Fakuldade) ho totál votu 422, liuhusi eleisaun ne’ebé hala’o iha Resintu Kampus Kaikoli, Díli (24/05).
Tuir Prezidente Ezekutivu pakote da-toluk eleitu Cesaltino de Jesus hateten, nia parte agradese tanba bele hetan konfiansa husi votante sira, iha eleisaun ne'e, maibé presiza fó ideia ba malu, nune'e kontribui ba dezevolve ita nia kampus FCS, liuhusi atividade hirak ne’ebé hatuur iha planu.
"Ami-nia mandatu programa maka, treinamentu ba debate, debate sientífiku no diskursu públiku, fo formasaun hakerek sentífiku, kursu komputadór, diskusaun semanál no iha mós modalidade desportu sira nsst.
Programa hirak ne'e maka ami sei tau prioridade iha mandatu no atu implementa maka ami sei servisu hamutuk ho ami nia ekipa no ami sei halo aprosimasaun mós ho maun, bin sira ne'ebé iha koñesimentu nomós dosente", dehan Prezidente Ezekutivu Eleitu.
Reprezentante votante Estela Perdigâo Gudinho Gaio husu ba estrutura eleitu atu servisu hamutuk hodi implementa programa sira liuliu liga ba problema sira ne'ebé estudante sira hasoru iha FCS.
"Ba senadu no nia estrutura sira atu bele kolabora hamutuk hodi bele hala'o sira nia knaar ho di'ak hodi responde ba estudante sira nia problema sira no bele halo mudansa ne'ebé mak di'ak liután ba FCS, tanba ita boot sira mak sai hanesan matan no tilun ba estudante sira", dehan Estela.
Iha fatin hanesan Beatris de Araujo nu’udar votante rekomenda estrutura AAE-FCS tenki realiza programa sira ne'ebé aprezenta ona iha kampaña hodi bele promove di'ak liután kampus FCS.
"Ha'u rekomenda ba senadu foun FCS ne'ebé ami votante sira tau konfiansa hodi implementa duni programa sira ne'ebé aprezenta, nune'e bele promove liután estudante sira-nia kapasidade no mentalidade liu husi diskusaun, debate nsst, espera katak programa ne'ebé sira aprejenta bele implementa iha tempu badak", dehan Beatris.
Iha eleisaun ne’e partisipa husi votante 1.436, no distribui ba pakote I hetan votante hamutuk 97 (6,75%), Pakote II votante 153 (10,7%), Pakote III votante 422 (29,3%), Pakote IV votante 262 (18,2%), Pakote V votante 361 (25,1%), Pakote VI votante 133 (9,26%).
Média UNTL 
: Abrão do Rosario Soares ( estudante DCS)
: Abrão do Rosario Soares ( estudante DCS)Foto 
: Abrão&Zezinho&Francisco ( estudante DCS)
: Abrão&Zezinho&Francisco ( estudante DCS)