Universidade Nacional Timor Lorosa'e (UNTL ) nia Magnífiku Reitór, Profesór dr. João Soares Martins, MPH, Ph.D hamutuk ho Embaixadora Wang Wenly distribui bolsa-estudu ba estudante na'in sianulu resin haat (94), iha Auditóriu FECT-Hera, Díli (24/05).
Iha diskursu Reitór hatete, bolsa ne'e oferese ba estudante sira hodi estuda nune'e bele kontribui ba dezenvolvimentu Timor-Leste nian iha setor hotu, tanba bolsa ne'e oferese ba estudante sira ne'ebé valór di'ak no balu ne'ebé ekonomia la sufisiente hodi sustenta estudu inklui estudante nain haat ne'ebé hetan medalla kondekorasaun nu’udar vensedór ba desportu.
"Agradese ba bolsa ida-ne'e, husu estudante sira atu aproveita didiak hodi estuda, nune'e bele kontribui ba dezenvolvimentu nasaun nian iha setór hotu. Tanba bolsa ne'e oferese husi Embaixada Xina.
Lori naran universidade nian agradese profunda ba Governu Xina liuhusi nia embaixada no hein katak kooperasaun ne'e la'o nafatin ba oin, hodi kontinua apoiu ita-nia estudante sira, tanba kooperasaun ne'e signifikante tebes ba Timoroan sira", dehan Reitór.
Embaixadora Xina nian iha Timor Leste, Wang Wenly hatete, bolsa ne'e nu’udar programa ida husi Governu Xina nian, no fó parabéns ba estudante sira tanba liuhusi selesaun mak sira hetan bolsa ne'e.
"Ha’u kontente tebes hodi distribui bolsa ida-ne'e ba estudante sira no Governu Xina hakarak apoiu UNTL tanba UNTL nu'udar Universidade Públiku no úniku iha Timor-Leste. Ami hein katak estudante sira bele aproveita didiak hodi kontribui ba dezenvolvimentu Timor-Leste nian", tenik Embaixadora Xina.
Iha fatin hanesan Bolseira Rozalia Mónica Moruc, sente kontente bele selesiona mós ba bolsa refere, tanba selesiona tuir kritéria hanesan valór di'ak (3.00) ba leten no ba futuru sei esforsu atu mantein valor ne'ebé iha.
"Ha'u nu'udar benefisiária sente kontente tebes, tanba bele pertensia mós ba selesaun ida-ne'e no ba futuru, ha'u sei esforsu hodi mantein valór ne'ebé iha", dehan Estudante Faculdade de Direito ne’e.
Bolsa interna ne'e oferese ba estudante hamutuk na'in 94 kompostu husi méritu hamutuk na'in lima-nulu (50), bolsa kbiit laek hamutuk na'in haat-nulu (40) no bolsa espesial ba kondekoradu vensedór desportu hamutuk na'in haat (4).
Partisipa husi Proreitór ba Asuntu Kooperasaun nian, Profesór Tomé Xavier Jerónimo, Diretora Jerál ba Ensinu Superior no Siensia husi MESSK, Dra. Filomena Lay Guterres, Diretór Ezekutivu Fundu Dezenvolvimentu Kapitál Humanu (FCDH), Sr. Julio Aparicio, Visereitór, Proreitór, DiretórJerál, Dekanu, Dosente, Inan Aman husi Bolseiru sira no konvidadu sira.
Média UNTL 
: Leonia de Araújo da Costa
: Leonia de Araújo da CostaFoto 
: Leonia de Araújo da Costa & Domingos Amaral
: Leonia de Araújo da Costa & Domingos Amaral