Universidade Nacional Timor Lorosa’e (UNTL) nia Faculdade de Filosofia e Ciência Humana (FFCH) ho Asosiasaun Akadémika Estudantis Fakuldade (AAF) realiza semináriu ho tema “Independénsia Inkompleta” iha resintu Kampus Sentral UNTL nian, Díli (18/05) hodi komemora loron restaurasaun independénsia Timor-Leste nian ba dala XXII 20 Maiu (2002-2024).
Iha entrevista Diretora Departamento de Filosofia Profesora Marciana Almeida informa, semináriu refere realiza hodi fó hanoin fila-fali kona-ba restaurasaun Independénsia Timor-Leste nian, nune’e estudante sira bele reflete fali akontesimentu sira ne’ebé liu ona.
“Objetivu husi semináriu ne’e atu reflete fila-fali ba restaurasaun independénsia nian, nune’e estudante sira bele reflete ba akontesimentu pasadu ne’ebé liu ona. Aleinde ne’e bele kontribui ba prepara sira-nia an ba futuru. Seminariu ida ne’e sai hanesan bukae ida ba estudante sira hodi bele organiza sira-nia an ba iha sosiedade sira iha Timor-Leste”, dehan Diretora.
Iha fatin hanesan oradór husi FFCH-UNTL nian Profesór Dr. Nicolao Boromeo, hateten, nia parte partilla informasaun sira kona-ba futuru Timor-Leste iha análiza filosófika atu muda estudante sira nia fuan nomós halo reflesaun kona-ba Timor-Leste nia momentu independénsia.
“Ami mai partilla informasaun kona-ba lei no filosofia ba estudante universitáriu sira atu muda estudante sira nia pensamentu hodi halo reflesaun kona-ba Timor to’o ona ne’ebé no iha ne’ebé ona, tanba halo ona nia aniversáriu ba dala XXII”, dehan oradór.
Aleinde ne'e orador seluk mak Dr. Armindo M. Amaral dosente husi ISFIT no partisipa iha seminariu ne'e dosente, estudante husi Institutu Filosófico S. Francisco de Sales, Seminarista husi Dom Bosco, seminarista husi Fatumeta, frater sira, estudante UNTL no funsionariu sira.
