Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH, Ph.D, hamutuk ho estrutura no sívitas akadémika presta omenajen ba matebian Tomas Soares de Carvalho ne’ebé termina nia jornada moris, iha HNGV, Díli 17 Maiu 2024.
Reitór UNTL, lori sívitas akadémika universidade nian, hato’o sentidu kondelénsia ba família liuliu ba matebian ne'ebé durante ne’e dedika nian an ba universidade ho tempu naruk no servisu nunka sente kolen.
“UNTL mós triste tanba sente lakon rekursu ida ne'ebé servisu ho tempu naruk iha UNTL no matebian mós servisu badinas tebtebes, nunka sente kole, la’ós família de’it mak sente lakon”, tenik Reitór, iha rezidénsia matebian nian, Caicoli, Díli (17/05).
Reitór mós konvida sivitas akadémika UNTL nian atu hato’o orasaun hamutuk ho família matebian no liuliu matebian nia kaben no oan sira atu forsa nafatin, nune’e, Maromak bele haraik perdaun no fo fatin di’ak ba matebian nia klamar.
Matebian Tomas Soares de Carvalho moris iha loron 7 Marsu 1966, hakotu nia peregrinasaun iha Ospital Nasional Guido Valadares iha 17 Maiu 2024, ho idade 58. Matebian ho knaar ikus nu’udar funsionáriu iha Faculdade de Ciências Ezatas (FCE-UNTL).
Média UNTL : Leonia de Araújo da Costa
Foto : Leonia de Araújo da Costa