Universidade Nacional Timor Lorosa'e (UNTL) hamutuk ho Organizasaun Saude Mundial (OMS) lansa ona Kurríkulu ba lisensiatura iha Departamento de Nutrição e Dietética, (DND), Faculdade de Medicina e Ciência da Saúde (FMCS), iha Auditóriu INAP nian Comoro, Díli (17/05).
Iha lansamentu ne'e Reitór UNTL hatete, kurríkulu ne'e importante tebes, tanba nu'udar kritéria ida husi Ajénsia Nasional ba Avaliasaun no Akreditasaun Akadémika (ANAAA) nian, tanba ne'e parabéns ba ekipa husi kursu Nutrisaun nian ba esforsu tomak.
"Ha'u hakarak hato'o parabéns ba kursu Nutrisaun, tanba ohin ita bele lansa ona kurríkulu ne'e, no importante tebes tanba nu'udar kritéria ida husi ANAAA nian, hakarak agradese mós ba OMS no parte hotu nia apoiu ba elaborasaun kurríkulu ida-ne'e", dehan Reitór.
Reprezentante OMS iha Timor-Leste nian, Dr. Arvind Mathur hateten katak, durante ne'e OMS sempre apoiu Kursu Nutrisaun no Dietétika, tanba kursu ne'e importante tebes ihaTimor-Leste, no OMS kontente tebes bele lansa ona kurríkulu ne'e hodi haforsa aprendizajen pré-servisu iha Sistema Nutrisaun no Ai-han nian.
"OMS suporta ona UNTL hodi atualiza kurríkulu ba lisensiatura iha Nutrisaun no Dietétika. Ha'u kontente tebes ho lansamentu ida-ne'e tanba, kurríkulu ne'e mak haforsa aprendizajen pré-servisu iha Sistema Nutrisaun no Ai-han nian, OMS kontinua apoiu tékniku hodi hadia saúde no moris di'ak ba timoroan sira", dehan Dr. Arvind.
Lansamentu ne'e akompaña husi Dekana FMCS nian, Profesora Lídia Gomes, Diretór Diresaun Nacional ba Avaliasaun no Akreditasaun (DNAA) nian, Sr. Agostinho Quelo, Vise Dekanu III Acásio de Jesus, sira, Diretór Departamentu de Escola Superior de Tecnologia da Saúde (ESTeS) Miguel Soares, no partisipa husi dosente, diretór, funsionariu sira husi Ministériu Saúde, ekipa tékniku ESTes, estrutura Alumni Nutrisaun Dietétika no estudante sira.
Média UNTL 
: Leonia de Araújo da Costa
: Leonia de Araújo da CostaFoto 
: Leonia de Araújo da Costa
: Leonia de Araújo da Costa