Universidade Nacional Timor Lorosa’e (UNTL) nia Faculdade de Engenharia Ciência e Tecnologia realiza kontinuasaun jogu ba Enjeñaria Cup Faze Daruak nian ho modalidade Futsal no Basketball ba feto ho mane, iha kampu Futsal BJ Habibi, Díli (18/05).
Komisaun Organizadora Tito dos Reis V. C. Guterres informa, atividade jogu ne’e hanesan kontinuasaun ba faze daruak nian iha Enjeñaria Cup 2024 nian.
“Jogu ne’e hanesan kontinuasaun ne’ebé fazeadamente Enjeñaria Cup ba iha jogu Futsal no Basketball nian, tanba iha faze dahuluk ne’ebé hala'o iha fulan Fevereiru ne’e ita hahú ho jogu Futebol, nune’e jogu refere sei termina iha fulan Juñu tinan 2024 ne’e”, dehan Tito.
Partisipa iha jogu ne’e hamutuk klubu ruanulu resin ualu (28) iha futsal nian ba feto ho mane no ba basketball nian ba feto ho mane ne’ebé mai husi Alumni, Finalista no estudante ativu husi departamentu lima (5) iha FECT.
