VRAE REALIZA KAFE JÉNERU ‘’REVOLUÇÃO DO CRAVOS E SEU IMPACTO A TIMOR LESTE’’

Universidade Nacional Timor Lorosa’e (UNTL) liuhusi Visereitoria ba Asuntu Estudantis (VRAE) nia Gabinete Assuntos Relacionados Questões Politicas de Genero (GARQPG) realiza atividade Kafé Jéneru ho tema ‘’Revolução dos Cravos e Seu Impacto à Timor Leste’’ iha Auditóriu FEG nian, Díli (10/05).

 

Profesora Judite Dias Ximenes hatete, programa ne’e diskusaun ida hodi fahe koñesimentu kona-ba asuntu jéneru nian ho foku ba revolusaun kravus no nia impaktu ba timoroan.

 

‘’Ohin mós ami konvida oradora husi OPMT mai fahe mós esperiénsia ne’ebé sira halo husi tinan 1974-1975 nian, durante iha ailaran to’o agora hodi nune’e bele motiva fali ba alin estudante sira atu bele hetan inspirasaun foun no badinas estuda hodi banati tuir espíritu joven sira uluk nian, nune’e bele hadia sira-nia futuru di’ak liután’’, dehan Profesora Judite.

 

 

 

 

 

 

 

 

 

 

 

 

Iha fatin hanesan Veterana Maria de Fatima Kalçona husi Organizasaun Popular da Mulher Timor (OPMT) hatete, materia ne’ebé nia fahe kona-ba feto nia partisipasaun iha luta ba ukun rasik aan, atu bele fó motivasaun ba alin feto sira agora nian atu tenki brani nafatin atu defende lialoos, tanba feto sira uluk sei iha idade ne’ebé ki’ik maibé bele brani hodi ajuda ba mane sira bainhira inimigu atu tama.

 

‘’Hau mós husu ba feto no mane sira agora nian atu bele hakas aan disiplina iha moris, tanba atu hetan domin no igualdade sei hahu husi uma laran. Ha’u mós hakarak enkoraja ba feto maluk sira tenki brani hodi foti desizaun ba asuntu sira no tenki iha korajem atu bele mobiliza, bele organiza no bele fó motivasaun ba sira seluk hodi la’o nafatin ba oin’’, hatutan Veterana Maria.