Universidade Nacional Timor Lorosa’e (UNTL) nia Faculdade de Turizmu, Artes, Indústrias, Criativas e Culturais (FTAICC) disemina Regulamentu Akadémika universidade nian ba estudante no dosente sira, iha Salaun Nelio Restorante, Metiaut, Díli (10/05).
Dekanu FTAICC Profesór Dr. Feliciano Quintas do Céu hateten, momentu konfraternizasaun sira hanesan ne’e mak oportunidade diak atu bele partilha regulamentu akadémika ba sívitas akadémika tomak fakuldade nian.
“Ne’e sosializa Regulamentu Akadémika ba estudante anu Létivu 2024 nian ne’ebé antes ne’e fakuldade lakonsege partilla, tanba tempu limitadu, ho nune’e aproveita oportunidade ohin bele sosializa sívitas akadémika sira, atu ita hotu bele komprende kona-ba lala’ok akadémiku iha FTAICC nian”, hateten Dekanu FTAICC, iha ámbitu Konfraternizasaun FTAICC tinan 2024 ho tema (Konstrusaun Kualidade no Unidade Perante Progresu ida diak liu iha FTAICC), iha Metiaut, Díli.
Iha fatin hanesan Diretór Departamento de Comércio no Turizmu Profesór Aloysius Louis Henriques hateten FTAICC atu la’o ho diak presiza kontribuisaun husi parte hotu hanesan dosente, funsionariu, no estudante sira.
“Hanesan Diretór Departamentu hakarak agradese ba parte hotu liuliu komisaun organizadora no estrutura fakuldade nian, ne’ebé halibur ita iha fatin ne’e no liuhusi atividade sira hanesan ne’e mak ita fahe ba malu hanoin, hodi konstrui diak liután FTAICC ba futuru”, hateten Profesór Aloysius.
Aleinde sosializa regulamentu Akadémika, fó mós pose ba (estrutura Asosiasaun Departamentu, estrutura Alumni FTAICC), lansa mos organizasaun Clubu Estudu ho Akadémika Turismu Verde no) no Fahe sertifikadu ba manan na’in iha kompetisaun (Poezia, Resiklajen, Dansa Kultura no Koral).
Partisipa husi Dekanu, Vise Dekanu, Estrutura Departamentu Turismu no Komersiu, Xefe Departamentu Estudantís no Alumni Empregabilidade Sr. Elvino Alves Correia, dosente no estudante sira.
Média UNTL 
: Agostinho da Cruz e Silva
: Agostinho da Cruz e SilvaFoto 
: Domingos Amaral
: Domingos Amaral