Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins MPH, Ph.D hamutuk ho estrutura Estudante Hadomi Natureza (ESHANA) realiza serimónia transformasaun ESHANA husi Faculdade de Economia e Gestão ba universidade.
Magnífiku Reitór hato’o parabéns ba FEG, tanba bele kria organizasaun ida ne'ebé hala'o atividade ida importante tebes, hanesan kuda ai oan, realiza jornada, treinamentu no hamoos ambiente no seluk tan.
“Husi atividade hirak ne'e tulun timoroan sira, tanba antes ne’e ha'u rasik husu imi tranforma tiha Eshana mai UNTL no ohin imi realiza duni, parabéns ba FEG tanba bele kria organizasaun ida di'ak tebes, espera ba oin bele akumula fakuldade sira seluk tuir kriteria ne'ebé ita boot sira hatur, no ba oin universidade sei apoia nafatin tuir kbiit ne'ebé ita iha", dehan Reitór iha Auditóriu FFDTL nian, Fatuhada Díli (9/05).
Tuir Konseleira ESHANA nian, atual Visereitora ba Asuntu Estudantís, Dra. Lígia Tomás Correia hato'o benvidu ba ESHANA FEG transforma ona ba UNTL, apresia tebes ho kolaborasaun hotu no servisu makas husi ezisténsia to'o ohin loron.
"Ha'u hakarak hato'o ha'u-nia boas-vindas ba ESHANA FEG ne'ebé transforma ona mai iha UNTL, ha'u fó apresiasaun boot ba imi, tanba bele kolabora malu ho di'ak hodi organiza organizasaun ida ne'e hahú husi nia ezisténsia iha tinan 2009 to'o mai ohin loron 2024", dehan Visereitora.
Koordenadór ESHANA nian, Henrique Bento Pereira agradese ba universidade, tanba bele simu ona ESHANA nu'udar organizasaun universidade nian, tanba durante ne'e iha de’it FEG.
“Durante ne’e, ami-nia ezisténsia iha fakuldade de’it, maibé ohin liuhusi transformasaun ne'e, ESHANA sei servisu makas liután iha sosiedade”, dehan Henrique.
Partisipa husi Proreitora ba Asuntu Provedoria no Akonsellamentu, Profesora Teresa de Jesus Vaz Cabral, Prezidente Senadu Jerál Estudante Universidade nian, Cristovão de Araújo ho senadu fakuldade sira, fundadór ESHANA-FEG nian ho nia membru sira no konvidadu balu.
Média UNTL 
: Leonia de A. da Costa
: Leonia de A. da CostaFoto 
: Laurindo da Cruz Gomes
: Laurindo da Cruz Gomes