Universidade Nacional Timor Lorosa'e (UNTL), nia Faculdade de Economia e Gestão(FEG), realiza serimónia judisium ba dala ruanulu resin hitu (XXVII), hodi distribui títulu akadémiku ho lisensiatura ba finalista hamutuk neennulu resin ualu (68), iha salaun CNE Kolmera, Díli (20/10).
Iha diskursu Magnífiku Reitór, Profesór dr. João Soares Martins, MPH, Ph.D, hato'o agradese ba Inan-Aman, liuhusi konfiansa ba UNTL hodi suporta oan sira-nia estudu, nune'e bele kompleta lisensiatura iha área ekonomia nian ne’ebé universidade oferese.
"Agradese ba Inan-Aman liuhusi konfiansa mai UNTL, nomós parabéns ba estrutura FEG nian no profesór, funsionáriu sira ne'ebé dedika an iha tempu naruk akompaña ita bo'ot sira. Liuhusi pasiénsia eduka hodi transmiti siénsia no matenek ba prosesu ensinu ne'e hanesan bukae ida atu imi bele aplika iha sosiedade", tenik Reitór.
Iha sorin seluk, Minístru Ensinu Superiór, Siénsia no Kultura (MESSK), S.E. José Honório da Costa Pereira Jerónimo, hato'o agradese ba estrutura universidade nian no fakuldade liuliu ba profesór sira ne'ebé eduka estudante nune'e sira bele kompleta estudu iha universidade liuliu iha kursu ekonomia.
"Agradese ba estrutura fakuldade nomós husu ba fakuldade sira hotu iha UNTL, hakarak atu sai mellor tenki servisu makas. Nune'e bele hadia kualidade iha ensinu no tenki aprosima ba regra ne'ebé estabelese ona iha universidade", dehan Ministru MESSK.
Totál husi finalista FEG nian 68 ne’e, kompostu husi Departamento de Ciência Economia (15), Departamento de Contabilidade (12), Departamento de Comércio Turismo (29) no Departamento de Economia e Gestão (12).
Partisipa husi Visereitór ba Asuntu Administrasaun Finansas no Administrador Jerál, Profesór Helio A. X. Mauquei, Proreitór, Dekanu, Vise-Dekanu, Diretór Departamentu, Dosente, Funsionáriu, Konvidadu, Inan-Aman, no E
estudante sira.
#TimorLeste #UNTL#FEG #MESSK 20 Outubru 2023
Média UNTL 📝: Denilson Amandio Barros
Foto 📷: Denilson A. Barros & Eugenia de Jesus