Universidade Nacional Timor Lorosa’e (UNTL), nia sivitás akadémika (Estudante, Funsionáriu no Dosente) halo peregrinasaun ba na'in Feto Ave Maria, iha Fatu-Bessi Ermera hodi halo devosaun ba Na'in Feto, iha estasaun Ave Maria iha Fatubessi, Postu-Administrativu Hatulia, Munisípiu Ermera (18/10).
Iha entervista Proreitora ba Asuntu Provedoria no Akonsellamentu(PRAPA) Profesora Teresa de Jesus Vaz Cabral, hatete, atividade peregrinasaun ne’e atu lori sivísta akadémika liuliu estudante sira hodi hakbesik-an ba Maromak hodi hato'o preokupasaun ne’ebé hasoru iha moris loron-loron.
"Ita halo peregrinasaun ne'e ho objetivu atu lori sivista akadémika sira atu bele hakbesik an ba Maromak hodi hato’o sira-nia preokupasaun, ne’ebé sira hasoru iha sira-nia moris, ba Na'in Feto liuhusi halo orasaun”, dehan Próreitora Teresa.
Iha fatin hanesan Kapelaun UNTL nian, Pe. Nivio Lebre Correia, Fdcc, mós hamenu ba sivísta akadémika liuliu ba estudante universitáriu sira katak, halo orasaun liuhusi devosaun ne’ebé iha bele haklaken iha idaidak nia moris, família no ba sosiedade.
"Imi fila ba haklaken roman ida-ne’e hahú husi imi-nia an ba imi-nia família no estudu ba ema hotu ne’ebé hasoru iha imi-nia moris, hanesan mós masin rai nian, nune'e prepara imi-nia an atu moris bele hamer sosiedade ho imi-nia prezensa", hateten Pe. Nivio.
Peregrinasaun ne'e organiza husi Gabineti Proreitoria ba Asuntu Provedoria no Akonsellamentu (PRAPA), no partisipa husi funsionáriu, estudante no dosente husi fakuldade sira.
#TimorLeste #UNTL #PRAPA 19 Outubru 2023
Média UNTL 📝: João Bosco Alves
Foto 📷: João Bosco Alves