#TimorLeste #UNTL #FCS #COVID19 #COVID19TL 06 April 2022
Universidade Nacional Timor Lorosa’e (UNTL), nia Magnífiku Reitór, Profesór dr. João Soares Martins, MPH, Ph.D, ho estrutura hala’o vizita ba Faculdade de Ciências Sociais (FCS) hodi haree diretamente infraestrutura nian no fasilidade sira, inklui diskusaun ho estrutura Fakuldade, iha Kampus Kaikoli UNTL nian, Díli (05-04).
“FCS ne’e importante tebes atu prepara futuru líder nasaun nian, tanba ne’e ita sei haree hotu oinsa melloria kondisaun iha Fakuldade, nune’e ita bele fó atendimentu ne’ebé di’ak ba estudante sira, promove UNTL nia existensia i visibilidade iha sosiedade importante tebes", tenik Magnífiku Reitór.
Iha sorin seluk, Dekanu FCS, Profesór Camilio Ximenes Almeida, hato’o ba Magnífiku Reitór ho estrutura atu tau atensaun ba Fakuldade, liuliu iha infraestrura liga ba edifísiu, no fasilidade sira ba aprendizajen nian. 
“Infraesturtura sira ne’ebé FCS utiliza mak ohin ita haree hotu ona kondisaun real, kursu hitu mak eziste iha ne’e, neen avalia ona husi ANAAA (Ajénsia Nasionál ba Avaliasaun no Akreditasaun Akadémika) maioria ho rezultadu hetan valór C no ida mak hetan B, enkuantu kursu Inkluzaun Komunitaria Sosiál mak seidauk avalia, maibé ami esforsu atu mellora iha futuru”, hatutan.
Profesór Camilo mós hatutan tan katak, bazeia ba kondisaun real no rezultadu avaliasaun nian, indika katak presiza mellora kondisaun infraestrutura, fasilidade sira, hasae kualifikasaun dosente, no promove peskiza iha área Siénsia Sosiál nian.
Vizita ne’e, partisipa husi Visereitór, Proreitór, Diretór-Jerál, Diretór Nasionál, Visedekanu, Diretór Departamentu sira, dosente no estudante sira.
Média UNTL 📝 : Altur Ramos
Foto 📷 : Avelino da C. Bobo