#TimorLeste #UNTL #PRAK #COVID19 #COVID19TL 5 Abril 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH Ph.D, akompaña husi estrutura, funsionáriu no dosente Universidade nian partisipa iha serimónia fúnebre matebian Ana Paula dos Santos Soares, iha Semitériu Manleuana Díli, (03/04).
Liuhusi misa corpo prezente iha kapela Lesibutak Manleuana, Díli, Magnífiku Reitór agradese ba matebian nia dedikasaun ba Universi
dade, no família boot UNTL sente triste, tanba lakon ema di’ak ida ne’ebé durante dedika-an ba Universidade to’o hakotu nia jornada moris.
“Ba família no Universidade, ohin ita asiste ba dala ikus nian ita nia bin, alin no oan Ana Paula ne’ebé mak hakotu ona nia viajen iha mundu ne’e, UNTL triste no laran susar tanba ho nia dedikasaun no kontribuisaun barak tebes, ami laiha buat ida atu hato’o maibé ita hotu hasa’e nafatin orasaun atu bele hetan fatin di’ak iha mundu seluk”, tenik Reitór.
Antes ne’e, Universidade mós presta ona omenajen iha matebian nia rezidénsia ne’ebé partisipa husi Visereitora ba Asuntu Estudantís, Profesora Eng.ª Lígia Tomás Correia, M.Sc, Próreitora ba Asuntu Kooperasaun, Profesora Doutora Lídia Gomes, Diretór-Jeral Servisu Apoiu Reitoria, Sr. Jacinto H. S. Belo, Eis-Reitór Próreitor na Asuntu Kooperasaun, Profesór Doutór Eduardo Aniceto Serrão, funsionáriu no dosente sira UNTL nian.
Matebian hakotu iis iha Hospital Nacional Guido Valadares, iha 1 Abril 2022. Antes ne’e, hala’o knar hanesan funsionária iha Gabinete Proreitoria ba Asuntu Kooperasaun- UNTL, durante tinan sia (2013-2022) hodi dedika-an ba Universidade Nasionál to'o remata nia jornada moris iha mundu.
Ana Paula dos Santos Soares, moris iha Suku Asumanu, Postu-Administrativu Liquiçá, Munisípiu Liquiçá iha loron 25 Novembru 1989. Matebian nu’udar oan husi José Soares no Rosa dos Santos Lobo, oan dane’en husi maun alin nain sia.
Sra. Ana Paula dos Santos Soares hahú tama eskola Primaria Nú. 3 Fatumeta, Díli (1995-2001),depois kontinua ba ensinu Pre-Sekundária iha Ensinu Sekundáriu Nú. 4 Fatumeta, Dili, 2001 to’o 2004, Ensinu Sekundáriu Externato São José, Comoro, Dili (2004-2007), hafoin kontinua ba Ensinu Superiór iha Universidade Nacional Timor Lorosa’e (2008 –2013), Fakuldade Enjeñaria, Siénsia no Teknolojia hodi hetan títulu Licenciada em Engenharia Informática.
Matebian durante sei moris dedika nia-an hodi servi instituisaun UNTL iha Gabineti Próreitoria ba Asuntu Kooperasaun, komesa iha tinan 2013 to’o nia jornada moris iha mundu remata iha loron 01 Abril 2022.
Tempu pasa ho lalais, tristeza boot ba família, matebian husik hela nia kaben Leonardo Fernandes no oan, iha idade 32.
Tristeza ida ne’e mós hafalun estrutura universidade, funsionáriu no liuliu hirak ne’ebé mak koñese no servisu hamutuk ho nia, sente lakon ema di’ak ida ne’ebé dedika nia-an hodi kontribui nia esperiensia ba Dezenvolvimentu Universidade nian, maibé Maromak planu buat seluk ida. Adeus Ana Paula 💙.
Média UNTL 📝 : Agostinho da Cruz e Silva
Foto 📷 : Denilson Amandio Barros