#TimorLeste #UNTL #VRAE #CBA #COVID19 #COVID19TL 05 Marsu 2022
Universidade Nacional Timor Lorosa’e (UNTL) liuhusi Asembleia Jerál ne'ebé organiza husi Visereitoria ba Asuntu Estudantís eleje ona Clarinha David Loe ho nia pakote eleitu hodi lidera Kooperativa Brilla Akadémika (CBA) ba períodu 2022 -2026. 
Iha Fakuldade Ekonomia no Jestaun FEG-UNTL nian, Díli (03/03), Visereitora ba Asuntu Estudantís, Profesora Eng.ª Lígia Tomás Correia, M.Sc, iha nia entrevista hateten, objetivu harii CBA ne’e atu ajuda Sívitas Akadémika sira ne’ebé iha difikuldade relasiona ho nesesidade estudu nian.
“Objetivu harii Kooperativa Brilla Akadémika ne’e atu ajuda Sívitas Akadémika sira, atu bele iha nesesidade naton ba sira-nia presiza, liliu ba estudante sira, tanba bele faan sira-nia produtu ho kriatividade sira hodi hetan fila-fali osan”, tenik VRAE.
Visereitora mós hatutan CBA ne’e, bele sai laboratóriu negósiu ba hirak ne’ebé hola parte iha membru, tanba bele faan produtu ne’ebé sira prodús rasik hodi hetan fila-fali ba osan.
Iha fatin hanesan, Prezidente eleitu CBA nian, Sra. Clarinha David Loe hateten, Kooperativa Brilha Akadémia ne’e foun, mak sira sei halo aproximasaun ho estudante sira hodi hola parte.
“Ami sei aprosima ho estudante sira iha UNTL, atu envolve liuliu hirak ne’ebé difisil liu hodi sustenta sira-nia nesesidade nu’udar estudante, no CBA ne’e kooperativa multisetorál, ita sei investe no aplika ita-nia kreatividade hodi produs buat ruma hodi fa’an hafoin hetan fila-fali osan”, tenik Clarinha.
Iha eleisaun ba estrutura CBA nian partisipa husi membru na'in 28, avansa ho pakote A (Prezidente mak Sra. Clarinha David Loe ho nia estrutura ho votu 20), enkuantu pakote B (Prezidente mak Sr. João Hornay ho nia estrutura hetan hetan votu 😎. 
Média UNTL 📝 : Agostinho da Cruz e Silva
Foto 📷 : Agostinho da Cruz e Silva