#TimorLeste #UNTL #FCS #COVID19 #COVID19TL 24 Fevereiru 2022
Universidade Nacional Timor Lorosa’e (UNTL) nia Faculdade Siénsia Sosiál (FCS), Departamentu Siénsia Polítika (DCP) no Departamentu Komunikasaun Sosiál (DCS) realiza semináriu ho tema “Repõe Ordem Constitucional e Instituições Democráticas”, ho objetivu atu kompleta prátika husi estudante sira ne’ebé aprende matéria opsaun Dezenvolvimentu Polítiku, iha Kampus Kaikoli UNTL nian, Díli (23/02).
Dekanu FCS nian, no hanesan mós dosente disiplina nian, Profesór Camilo Ximenes Almeida, hateten semináriu refere, realiza ho inisitiva husi estudante sira, hakarak rona kandidatu ba Prezidente Repúblika sira 2022-2027 sira-nian misaun no vizaun.
“Eventu ne’e realiza ho inisiativa husi estudante sira, tanba sira aprende ona materia dezenvolvimentu polítika, liu-liu estudante Siénsia Polítika no Komunikasaun Sosiál, sira hakarak rona kandidatu sira-nia vizaun no misaun, nune'e, bele sai mós lisaun ba sira idaidak”, hatutan Profesór Camilo.
Dekanu hatete, aproveita tempu ne’e konvida kandidatura hotu, maibé sira seluk la disponivel, konsege konvida kandidatura na’in lima mak disponive hanesan Dra. Maria Helena Lopes de Jesus Pires (Dra. Milena Pires), Dr. Constancio Pinto “Terus”, Dr, José Manuel Ramos-Horta, Dr. Martinho Gusmão, no Dr. Antero Benedito da Silva.
Iha fatin hanesan Sandra da Costa Lay, Estudante DCP, semestre 6 haktuir katak, liuhusi semináriu refere fó hanoin katak tempu to’o ona feto kompete hodi ukun nasaun ida ne’e, hodi hatan ba dezafiu ne’ebé povu hasoru.
“Buat ne’e mak aprende husi semináriu ne’e katak tempu to’o ona atu feto mós bele kompete hodi ukun nasaun ne'e, haree liubá formulasaun polítika públika hodi responde ba desafiu ne’ebé komunidade hasoru”, hatutan.
Semináriu refere oradór husi Kandidatu ba Prezidente Repúblika 2022-2027, Dra. Maria Helena Lopes de Jesus Pires (Milena Pires), Dr. Constancio Pinto “Terus”, Dr, José Manuel Ramos-Horta, Dr. Martinho Gusmão, no Dr. Antero Benedito da Silva. Partisipa iha semináriu dosente, estudante no konvidadu sira.
Média UNTL 📝: Flora Ana Maria Ximenes (estajiária)
Foto📷 Alsino da Costa Madeira, Crispin de Jesus Amaral, Amaro de Jesus (estajiáriu)