#TimorLeste #UNTL #SEJD #COVID19 #COVID19TL 22 Fevereiru 2022
Universidade Nacional Timor Lorosa’e (UNTL) koopera ho Sekretaria Estadu Juventude no Desportu (SEJD) no Embaixada Cuba 🇨🇺 iha Timor-Leste, konsege destaka formadór espesífiku iha área Edukasaun Fízika no Desportu na’in haat (4) hodi apoiu prosesu aprendisajen ba Departamentu Ensinu Edukasaun Fízika no Desportu, Fakuldade Edukasaun, Arte no Umanidade (DEFD-FEAH).
Eventu ne'ebé hala'o iha Sala Video Konferénsia UNTL nian, Díli (22/02) ne'e, Magnífiku Reitór UNTL, Profesór dr. João Soares Martins, MPH, Ph.D, agradese ba SEJD ho Embaixada Cuba nian ho apoiu liuliu rekursu umanu atu kontribui ba melhora liután kualidade ensinu DEFD-FEAH nian.
“Agradese ba SEJD ho Embaixada Cuba nian, ohin ita bele hasoru malu fali iha ne’e, ba servisu hamutuk hodi rekursu ba Departamentu Ensinu Edukasaun Fízika no Desportu iha Fakuldade Edukasaun, Arte no Umanidade - UNTL bele funsiona ho di'ak”, tenik Reitór.
Magnífiku Reitór mós garante ho profesór na'in haat DEFD ne'e, bele forma rekursu umanu kualifikadu ba iha dezenvolvimentu ensinu báziku, no Sekundáriu iha Timor-Leste ne'ebé presiza profesór.
Iha fatin hanesan, S.E. Sekretáriu Estadu Juventude no Desportu, Eng. Abrão Nokosiku Saldanha, hateten planu prioridade SEJD nian mós hakarak atu dezenvolve liután área desportu nian iha Timor-Leste tanba ne’e mak presiza mós manorin na’in sira kualidade.
“SEJD nia importánsia mak foku liubá dezenvolve área desportu hanesan aliserse tanba ne’e presiza duni profesor kualifikadu, nune’e hanesan na’in ba DEFD atu apoiu hodi melhora kualidade kursu ne’e no tuir ami-nia hanoin pontu-aranke mak UNTL tanba ne’e ami mós sei akompaña nafatin kursu to’o momentu ne’ebé universidade bele ona hodi jere rasik”, tenik S.E. Sekretáriu Estadu.
Partisipa iha sorumutu ne’e Visereitór, Dekana Fakuldade Edukasaun, Arte no Umanidade, Profesora Doutora Ana Cristina Silveira de Jesus Martins, Diretór DEFD Profesór Filomeno Amaral Bria, Diretór-Jerál Juventude SEJD, Sr. David Tomás de Deus, no konvidadu sira.
Média UNTL 📝 : Agostinho da Cruz e Silva
Foto 📷: Denilson Amandio Barros