#TimorLeste #UNTL #DNAE #COVID19 #COVID19TL 15 Febreiru 2022
Universidade Nacional Timor Lorosa'e (UNTL) liuhusi Diresaun Nasionál Atendimentu Estudante (DNAE) nia Director, Sr. Rui Loco Pires, L.AP, iha Kampus Sentrál UNTL nian, Díli (8-02) hateten re-ingressu no semestre impár 2022 nian, dezde 17 de janeiro estudante na'in rihun sanulu resin neen, atus lima neenulu resin haat (16564) mak rejista ona. 
"Estudante UNTL hamutuk rihun haatnulu resin tolu, atus neen ualunulu resin neen (43686), husi totál ne'e estudante ne'ebé mai tuir ona rejistrasaun hamutuk 16564 no estudante ne'ebé seidauk tuir rejistrasaun hamutuk 27122", hatutan Diretór Rui.
Diretor DNAE ne'e hateten, fatin haat ne'ebé utiliza hodi halo rejistrasaun propinas ba estudante semestre impár 2022 mak, Fakuldade Siánsia Sosiál (FCS), Fakuldade Edukasaun, Arte no Umanidade (FEAH), Fakuldade Ekonomia no Jestaun (FEG) no Kampus Sentrál. 
“Ha'u fiar katak estudante sira sei mai halo rejistrasaun tuir kalendáriu ne'ebé husi parte DNAE avizu ona, idaidak ba tuir Fakuldade iha lokál rejista hanesan iha Kampus Sentrál, Canto Resende (FEG), Liceu no Kaikoli”, dehan Diretór DNAE.
Sr. Rui mós husu ba estudante sira ne'ebé seidauk re-ingresu, bele hakbesik ba idaidak nia lokál rejistu ona loron ikus mak 18 Febreiru, enkuantu estudante ne'ebé la rejistu sei la hetan subsídiu propinas ne'ebé Governu fó ba UNTL.
Média UNTL 📝 : Altur Ramos
Foto 📷 : Leonia de A. da Costa