TimorLeste #UNTL #VRAE #UNWOMENTimorLeste #COVID19 #COVID19TL 15 Fevereiru 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, hamutuk ho Visereitora ba Asuntus Estudantís (VRAE), Profesora Eng.ª Lígia Tomás Correia, M.Sc, hasoru malu ho Xefe Gabinete UNWomen Timor-Leste, Nishtha Satya, hodi diskute kontinuasaun programa Kampus Seguru, iha Kampus Sentrál Dili Timor-Leste (10/02).
Magnífiku Reitór hateten, importante tebes atu kontinua implementa Programa Kampus Seguru iha UNTL liuliu separa haris fatin, kria ekipa konsellu hodi kombate violénsia hasoru feto inklui programa sira seluk ne’ebé sei hala’o fali iha tinan oin.
“Ha’u sente interesante no importante tebes atu kontinua ita-nia kooperasaun ne’e tanba ita presiza kontinua implementa programa ne’e, liuliu hafahe haris fatin ba feto no mane, UNTL mós sei kria ekipa konsellu ida hodi haree asuntu direitu feto, no kombate violénsia hasoru feto sira nomós programa seluk ne’ebé ita atu hala’o iha tinan oin”, tenik Reitór.
Relasiona ho kooperasaun ne’ebé iha antes ne’e UNTL hamutuk ho UNWomen iha Timor-Leste implementa ona Programa Kampus Seguru hanesan Kompetisaun Diskursu Públiku, Hakerek Artigu, Pintura, MC no Kuda Aioan hodi hamatak kampus, halo promosaun ba kombate violénsia hasoru feto liuhusi Anúnsiu Públiku.
Média UNTL 📝 : Leonia de A. da Costa
Foto 📷 : Agustinho da Cruz E Silva