INAN FALUK ORGULLU HO OAN HETAN MELLÓR IHA UNTL

#TimorLeste #UNTL #GVRAGQ #DGSAA #DNAE #COVID19 #COVID19TL 13 Janeiru 2022

Universidade Nacional Timor Lorosa’e (UNTL) nia estudante na’in ha’at,  husi Fakuldade haat (Clarinha David Lopes husi Fakuldade Edukasaun, Arte no Humanidade, Fransisco Xavier da Conceição Pereira Paiva, Fakuldade Siénsia Sosiál, Ana Imeliança de Jesus Hula Muda, Fakuldade Direitu no Afonso Belo, Fakuldade Filozofia no Siénsia Umana, ho mellór klasifikasaun ba graduasaun XXV sesaun lokraik nian, iha Sentru Konvensaun Dili, (11/01).fal 1

Reprezentante inan-aman mellor graduandu nian, Viana Ximenes hateten, hanesan Inan faluk maibé orgullu ho oan nia esforsu hodi hetan mellór klasifikasaun iha UNTL.

“Mensajen ne’ebé hau nia kaben husik hela ba oan sira katak, maske aman hau kbiit la to’o maibé ha’u esforsu atu oan imi bele eskola, maibé imi tenke esforsu nune’e bele susesu, tanba ne’e hau kontente tebes ba ha’u nia oan Clarinha David Lopes ne’ebé hetan valor bo’ot” dehan Viana Ximenes.

Reprezentante mellór resen graduada, Clarinha David Lopes husi Fakuldade Edukasaun, Arte no Umanidade hateten, iha nia estudu sempre lembra mensajen husi nia aman matebian ne’ebé analfabetu, maibé hakarak oan sira tenke eskola to’o nivél universidade.” 

“Iha momentu ne’e ho orgullu remata ona estudu ho valór 3.39, ha’u hanoin fali Apa matebian nia liafuan katak, (ha’u mak la hatene lee no hakerek maibé ha’u hakarak imi tenke eskola to’o universdiade, maibé imi hakarak kontinua tan, esforsu ba hodi kontinua tanba hau nia kbiit to’o iha ne’e de’it ona), nu’udar oan ha’u hakarak esforsu nafatin hodi kontinua ba oin”, hatete Clarinha.fal 2

Graduada Clarinha mos hatutan, nia hakarak agradese ba ninia inan, maske mesak maibé sei esforsu halo negósiu hodi sustenta nia to’o remata estudu Lisensiatura iha Departamentu Formasaun Profesores Ensinu Báziku-FEAH.

Liuhusi sesaun lokraik nian ne’e, mudansa fita no atribui diploma ba resen-graduadu Fakuldade Edukasaun, Arte no Umanidade (207), Siénsia Sosiál (75), Direitu (15), no Filozofia no Siénsia Umana (9).

Partisipa iha eventu ne’e, Prezidente Komisaun Funsaun Públika, Sr. Faustino Cardoso, Ph.D, Provedora Direitus Humanos nian, Provedora Jesuina Maria Ferreira Gomes,  Korpu-Diplomátiku, Amu Kapelaun UNTL, Pe. Nivio Lebre Correia, Fdcc, dosente, funsionáriu, inan-aman, graduadu, no konvidadu sira.  

UNTL mós halo livestreaming  liuhusi pájina Facebook www.facebook.com/untl.edu.tl, nomós Kanál YouTube www.youtube.com/untl.edu.tl tanba servisu humutuk entre Diresaun-Jerál Servisu Apoiu Reitoria nia Departamentu Média no Komunikasaun (DEMKOM) no Departamentu Protokolu, Diresaun Nasionál Informasaun no Teknolojia (DNIT), Gabinete Visereitór ba Asuntu Akadémiku no Garantia Kualidade (GVAAGQ), Diresaun-Jerál ba Servisu Asuntu Akadémiku (DGSAA), liuhusi Diresaun Nasionál ba Atendimentu Estudante (DNAE). fal 3

Media UNTL 📝: Leonia de A. da Costa

Foto 📷 : Leonia de A. da Costa