UNTL NIA GRADUASAUN XXV INTEGRA GRADUADU 642 BA SOSIEDADE

#TimorLeste #UNTL #GVRAGQ #DGSAA #DNAE #COVID19 #COVID19TL 12 Janeiru 2022

Universidade Nacional Timor Lorosa’e (UNTL) nia Graduasaun XXV ne’ebé sei hala’o iha Centro de Convenções de Díli (11/01), sesaun dader nian ne’e, mudansa fita no atribui diploma ba resen-graduadu Fakuldade Agrikultura (94), Enjeñaria, Siénsia no Teknolojia(93), Medisina no Siénsia Saúde (134) no Fakuldade Ekonomia no Jestaun(15).  gra 1

Magnífiku Reitór liuhusi diskursu hateten katak graduasaun momentu espesiál ba estudante, inan-aman no universidade selebra susesu sira-nia susesu, hafoin tinan lubuk ida estuda iha universidade. 

“Susesu no graduasaun atinje liuhusi esforsu no sakrifísiu makaas, durante tinan barak nia laran, tan ne’e, ohin ofisialmente universidade husik imi, hodi fila ba serbí komunidade no nasaun tuir matenek no kompeténsia akadémiku ho responsabilidade, tanba ne’e, imi-nia susesu mak ita hotu nia susesu”, tenik Reitór.

Reitór mós agradese ba apoiu tomak Governu nian liuhusi MESSK, Sívitas Akadémika tomak universidade nian, ne’ebé dedika ona ba universidade no prepara ona fini liuhusi matenek ba graduadu sira no agradese mós ba inan-aman sira tanba la kolen tulun sira idaidak. gra 2

Iha fatin hanesan, Ministru Ensinu Superiór, Siénsia no Kultura (MESSK), S.E. Longuinhos dos Santos, ne’ebé reprezenta husi Diretora-Jerál ba Ensinu Superiór no Siénsia, Dra. Maria Fernanda Lay Guterres, hato’o felisitasaun ba graduandu no inan-aman sira.  

“Ohin iha graduasaun ne’e, hatudu katak UNTL kumpri nia misaun ne’ebé hala’o siklu formasaun ida dezde inísiu to’o imi-nia susesu ida ne’e, dezeja mós universidade nasionál sai sentru referénsia no kualidade ne’ebé hatutan liuhusi graduadu idaidak ba iha sosiedade”, hatutan DG

DG ne’e hatutan tan katak Governu liuhusi MESSK sei kontinua apoiu universidade nasionál hodi ultrapasa dezafiu sira no asegura kondisaun sira ba ensinu no aprendizajen, nune’e bele prepara foin sa’e sira, preparadu liután partisipa iha prosesu dezenvolvimentu. gra 3

Resen-graduadu, João Francisco Ruas Hornay, agradese ba apoiu no dedikasaun tomak husi família, no Sívitas Akadémika tomak ne’ebé fó ona apoiu ba graduadu idaidaik durante jornada universitária. 

“Ohin momentu, orgullu no felisidade, hafoin perkursu tomak akadémiku nian, liuhusi susesu ne’ebé ita hotu atinje, ho apoiu no prezensa Maromak nian, liuhusi família, dosente, funsionáriu no estrutura tomak universidade nian, nune’e, ita hotu kompromete atu aplika koñesimentu sira ho responsabilidade iha sosiedade no ba amada Pátria Timor-Leste”, hatutan. gra 7

Partisipa iha eventu ne’e, Ministru Agrikultura no Peska, S.E Pedro Reis, Ministru Petróleo no Rekursu Minerais, S.E. Victor da Conceição Soares, Ph.D, Prezidente Instituto Nacional de Ciência e Tecnologia, Sr. José Cornélio, Ph.D, Diretór Ezekutivu ANAAA, Sr. Edmundo Viegas, Ph.D, reprezentante Komisaun G Parlamentu Nasionál, Deputada Domingas dos Santos, Korpu-Diplomátiku, Amu Kapelaun UNTL, Pe. Nivio Lebre Correia, Fdcc, dosente, funsionáriu, inan-aman, graduadu, no konvidadu sira.  gra 4

UNTL mós halo livestreaming liuhusi pájina Facebook, www.facebook.com/untl.edu.tl nomós kanál YouTube www.youtube.com/untl.edu.tl tanba servisu humutuk entre Diresaun-Jerál Servisu Apoiu Reitoria nia Departamentu Média no Komunikasaun (DEMKOM) no Departamentu Protokolu, Diresaun Nasionál Informasaun no Teknolojia (DNIT), Gabinete Visereitór ba Asuntu Akadémiku no Garantia Kualidade (GVAAGQ), Diresaun Jerál ba Servisu Asuntu Akadémiku (DGSAA), liuhusi Diresaun Nasionál ba Atendimentu Estudante (DNAE). gra 5

Média UNTL 📝 : Miguel Gonçalves

Foto 📷 : Agustinho da Cruz e Silva, Denilson A. Barros, Artur Ramos, Leonia de Araujo, Laurindo Gomes, Miguel Gonçalves