#TimorLeste #UNTL #FMCS #DE #COVID19 #COVID19TL 27 Outubru 2021 - Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, halo abertura Estájiu Komunitáriu ne'ebé implementa husi Fakuldade Medisina no Siénsia Saúde (FMCS), Departamentu Enfermajen nia estudante na’in 145, iha Postu-Adminstrativu Laclo Munsípiu Manatuto, (26/10).
Magnífiku Reitór iha diskursu abertura hato'o ba estajiáriu sira atu aproveita oportunidadu no tempu hodi partilla no aprende esperiénsia husi kamunidade Laclo.
“Espera estájiu fulan rua bele lori imi aproveita esperiensia balun husi Komunidade Laclo ne'e, estájiu ida ne’e parte husi kurrikulár unidersidade nian, atu ita bo’ot sira tenki kumpri, ami sei husik hela ita bo’ot atu aprende hamutuk ho komunidade”, tenik Reitór.
Magnífiku Reitór mós husu ba estajiáriu apoiu governu halo sosializasaun ba komunidade liuliu vasinasaun atu bele aumenta imunidade komunidade nian hodi luta kontra Pandemia COVID-19.
Iha fatin hanesan, Dekanu FMCS, Profesór José Dionisio Ximenes, agradese ba Autoridade lokál no komunidade Laclo tanba disponível hodi simu universidade nasionál nia estudante sira.
“Hakarak agradese ba Adminitradór Postu Administrativu Laclo nian, tanba ho nia disponibilidade bele simu estajiáriu sira mai hala’o sira-nia estájiu durante fulan rua (26 Outubru 2021 to’o 28 Dezembru 2021) hamutuk ho komunidade iha ne’e”, tenik Dekanu.
Dekanu mós husu ba estajiáriu sira atu uza tempu ho másimu hodi alkansa planu hotu ne’ebé durante fulan rua nia laran, liuhusi servisu hamutuk ho autoridade no komunidade Laco nian.
Iha sorin seluk, Reprezentante Administradór Postu Administrativu Laclo, Sr. Andre Policarpo da Costa, agradese ba UNTL bele hili Laclo sai fatin ba estájiu tinan 2021 ne’e.
“Ha'u reprezentante administradór Postu Laclo nian, ami simu ho bemvindu ba alin estajiáriu sira no hakarak agradese ba UNTL bele hili Laclo sai fatin hodi hala’o estájiu Komunitariu atu bele akonsella inan-aman sira hodi partisipa iha vasinasaun” tenik.
Partisipa iha serimónia ne’e, Diretór-Jeral ba Servisu Apoiu Reitoria, Sr. Jacinto H. S. Belo, Dekanu FMCS Profesór José Dionisio Soares ho nia estrutura, Segundu Komandante PNTL Munisípiu Manatuto, Sr. Domingos de Deus, ho Membru Sira, Estajiáriu, Komunidade Laclo no konvidadu sira.
Média UNTL : Agostinho da Cruz e Silva
Foto : Agostinho da Cruz e Silva