#TimorLeste #UNTL #FAGRI #DPSM #UNDPTIMORLESTE #MAP #COVID19 #COVID19TL 24 Juñu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, halo abertura ba Workshop Nasionál ho tema “Survey on mangrove zonation, macrozoobenthos biodiversity and community perception of ecosystem based livelihoods and cultural for mangroves conservation Municipality”, organiza husi Departamentu Peskas no Siénsia Mariña (DPSM-FAGRI).
Eventu ne’ebé hala’o iha Auditóriu FECT-Hera, (24/06), ho objetivu atu aprezenta rezultadu survey ne’ebé mak estudante ho profesór sira halo iha fulan hirak liubá kona ba Zona Ai-parapa nian, klasifikasaun biodiversidade, no buka hatene kona-ba komunidade nia persepsaun no benefísiu ba ekosistema Timor-Leste nian liga ba moris kuotidianu nian.
Iha abertura Reitór agradese ba Ministériu Agrikultura no Peskas (MAP) no Programa Nasoens Unidas ba Dezenvolvimentu (UNDP) iha Timor-Leste ba kooperasaun hodi halo atividade importante ida ne’e.
“Agradese ba Ministériu Agrikultura ho UNDP ne’ebé ho laran luak bele koopera ho universidade nasionál ba servisu importante ida ne’e, ita hatene katak biodiversidade importante no mangroves ne’e parte ida importante tebes atu konserva no proteje”, tenik Reitór.
Iha fatin hanesan, Diretór DPSM nian, Profesór Mario Viegas Tilman, orgullu ba partisipante sira-nia prezensa tanba bele rona rezultadu survei ne’ebé antes DPSM halo ona iha munisípiu rua.
“Ohin DPSM senti orgullu ho ita bo’ot sira nia prezensa hodi rona rezultadu survei ne’ebé Departamentu halo ona iha munisípiu rua (Likisa no Dili), no survei ne’e rasik envolve direta husi estudante na’in 113 no akompaña husi profesór sira”, tenik Profesór Mario.
Koordenadór estudante ba iha survey ne’e, Junior Gama Pinto, hateten lisaun ne’ebé sira aprende bele hatene espesie sira ne’ebé moris iha area kosteira nian.
“Lisaun ne’ebé ami aparende iha survey ne’e mak bele hatene espésie hira mak moris iha área krosteira nomós komunidade nia dependénsia ba iha tasi ne’e oinsa, no seluk tan”, tenik Junior.
Estudu ne’e, implementa tanba kooperasaun di’ak entre UNTL, UNDP no MAP, no implementa husi DPSM-FAGRI, lokaliza iha Munisípiu Likisa (suku Batubou, no Ulmera) no Munisípiu Díli iha Suku (Sabuli Postu-Administrativu Metinaru nian, no suku Hera).
Partisipa iha Workshop ne’e Proreitora ba Asuntu Kooperasaun nian, Profesora Doutora Lídia Gomes, Dekanu Fakuldade Agrikultura, Profesór Carlito de Araújo,PhD, Dekanu Fakuldade Enjeñaria, Siénsia no Teknolojia (FECT) , Profesór Junior Raimundo da Costa, PhD, reprezentate UNDP nian, reprezentante Ministériu Agrikultura no Peskas, inklui mós Profesór no estudante husi DPSM.
Média UNTL : Agostinho da Cruz e Silva
Foto : Agostinho da Cruz e Silva