#TimorLeste #UNTL #GabCEDU #FCS #COVID19 #COVID19TL 22 Juñu 2021
Universidade Nacional Timor Lorosa’e (UNTL) nia Diretór-Jerál ba Gabinete Sertifikasaun no Avaliasaun ba Dosente Universitáriu (GabCEDU), Profesór Doutór Rui da Cruz, ho estrutura halo sosializasaun ba prosesu avaliasaun no progresaun dosente nian iha Fakuldade Siénsia Sosiál (FCS).
“Sosializasaun ne’e GabCEDU halo ona iha fakuldade seluk, ohin mai iha FCS ne’e, atu hato’o kona-ba prosesu no rekizitu sira ba avaliasaun no progresaun dosente nian, bazeia ba objetivu gabinete nian”, hateten Profesór Rui, iha Kampus Kaikoli, UNTL nian, Díli (22-6).
Diretór-Jerál ne’e fundamenta katak avaliasaun refere ho objetivu (1) dignifika servisu dosente nian iha ensinu superiór; (2) avaliasaun ba profisionalizmu dosente nian; (3) atu hasa’e kualidade iha prosesu ensinu superiór; (4) konkretiza objetivu jerál edukasaun nasionál nian; (5) konsensializa dosente sira ezerse funsaun tuir étika akadémika nian.
“Ami Gabinete fasilita nia prosesu, no atu define avaliasaun no progresaun dosente nian, hahú husi dosente idaidak, tanba ne’e, aproveita atu enkoraja profesór sira atu atualiza dadus sira bazeia ba rekizitu sira hodi submete tuir kalendáriu submisaun fakuldade nian”, hatutan Diretór-Jerál.
Relasiona ho sosializasaun refere, Dekanu FCS nian, Profesór Camilo Ximenes Almeida, apresia ho esforsu ekipa GabCEDU nian, hodi valoriza ho dignifika dedikasaun dosente sira-nian.
“Lori Fakuldade nia naran apresia ho esforsu tomak, no husu atu kontinua ho independente, ami fakuldade prontu koopera ho ekipa liuliu iha prosesu ba dadus sira, tanba ne’e dosente idaidak iha direitu atu partisipa iha prosesu ne’e”, dehan Dekanu.
Iha atividade ne’e, halo mós aprezentasaun ba kritériu sira husi Diretora Nasionál ba Dadus, Prosesu, Atribuisaun no Alokasaun Dosente, Profesora Zulmira Ximenes, M.Sc, no Diretór Nasionál ba Avaliasaun no Sertifikasaun ba Servisu Dosente, Profesór Matias Tavares, PhD.
Partisipa husi Dekanu FCS, Visedekanu sira, Konsellu-Doutór, dosente, no funsionáriu sira fakuldade nian.
Média UNTL : Miguel Gonçalves
Foto : Miguel Gonçalves