#TimorLeste #UNTL #PADI 1 Juñu 2021
Universidade Nacional Timor Lorosa’e (UNTL) nia Proreitór ba Asuntu Dezenvolvimentu Institusionál (PADI), Profesór Lelis Gonzaga, iha nia knaar fatin Kampus Sentrál UNTL nian, Díli (01/06) hateten edifísiu ba Fakuldade Medisina Siénsia da Saude (FMCS), atinje ona 100% no atu entrega ona ba univesidade.
“Ita-nia edifísiu foun ba FMCS, ne’ebé konstrui husi Kompañia Linear Unip, Lda, atinji ona pursentu 100 ne’ebé iha tempu badak kompañia sei entrega ba ita no nia kontratu sei remata iha (06/06) fulan ida ne’e”, tenik Profesór Lelis.
Profesór ne’e mós hatutan, edifísiu rua seluk ne’ebé konstrui husi kompaña Aitula Unip.Lda ne’ebé lokaliza iha Kampus Sentral foin atinji 54.72%, no Edífisiu foun iha Fakuldade Ekonomia no Jestaun (FEG) 58.46%.
Iha fatin seluk, Supervisór Kompañia Linear Unip, Lda Eng. Marino José Guteres hateten, sira-nia kontratu ho universidade termina semana ida ne’e, tanba ne’e, posibilidade no data tentativa sei entrega ba UNTL iha (4/06).
“Tuir kontratu iha fulan ida ne’e termina ona, agora dadauk halo de’it finaliza servisu balun tan, atu kompleta no tuir planu sei entrega iha dia (4/04) semana ida ne’e nia laran” tenik Eng. Marino.
Alumni UNTL ne’e mós hatutan, fasilidade sira ne’ebé presiza ba edifísiu ne’e sira monta hotu ona kompleta ho kazadebañu maibé eletrisidade mak seidauk bele lakan tanba sei hein autorizasaun husi EDTL.
Média UNTL : Agostinho da Cruz e Silva
Foto : Agostinho da Cruz e Silva