#TimorLeste #UNTL #VRAAGK 01 Juñu 2021
Universidade Nacional Timor Lorosa’e (UNTL) nia Visereitór ba Asuntu Akadémiku no Garantia Kualidade (VAAGK), Profesór Doutór Samuel Venâncio de Sousa Freitas, iha Kampus Sentrál UNTL nian, Díli (01/06) hateten, universidade kontinua estende implementasaun aula distánsia bazeia ba implementasaun Serka Sanitária (SS) no Konfinamentu Obrigatóriu (KO) iha munisípiu Díli.
“Ita hotu rona filafali ona katak SS ho KO estende tan ba loron 14 tan, ne’e signifika ita-nia atividade letiva sai nafatin ho modelu aula distánsia”, tenik Profesór Samuel.
Eis Presidente Konsellu Diretivu Ajénsia Nasionál ba Avaliasaun no Akreditasaun Akadémika (ANAAA) ne’e mós hatutan, aula prezensiál reativa bainhira iha ona instrusaun husi Ministériu Ensinu Superiór, Siénsia no Kultura (MESSK), no ba finalista sira ne’ebé atu konsulta monografia bele mai nafatin, maibé tenki kumpri nafatin protokolu prevensaun nian.
Entretantu, Serka-Sanitária no Konfinamementu Obrigatóriu iha munisípiu Díli, estentde tan komesa husi 01 Juñu 2021 to’o 14 Juñu 2021.
Bainhira mai Kampus UNTL, OBRIGATÓRIU ema hotu:
SEMPRE UZA MÁSKARA taka ibun no inus nian;
HADOOK-AN HUSI EMA SELUK ho distánsia pelumenus metro ida;
FASE KA DEZINFETA LIMAN molok tama fatin.
Ba Sívitas Akadémika tomak kontinua asesu informasaun ofisiál universidade nian, durante pandemia COVID-19 sei kontinua fo-sai de’it iha:
website www.untl.edu.tl ,
pájina Facebook UNTL nian www.facebook.com/untl.edu.tl .
Mai Ita Hamutuk Luta Kontra COVID-19!
Ita-nia Saúde Iha Ita-nia Liman Rasik!
Média UNTL : Agostinho da Cruz e Silva
Foto : Agostinho da Cruz e Silva