Universidade Nacional Timor Lorosa'e (UNTL), liuhusi Diresaun Nasional Atendimentu (DNAE), halo ona rejistrasaun ba estudante foun tinan 2025, hamutuk na'in rihun tolu atus lima, limanulu-resin haat (3.554).
Diretór DNAE Sr. Rui Loco Pires, iha nia knaar fatin Kampus Sentral, Díli (19/03), hateten estudante foun tinan 2025 akumula husi fakuldade sanulu ne'ebé konsege halo ona rejistrasaun iha DNAE hamutuk na'in 3.554.
"Estudante foun sira ne'ebé mai halo ona rejistu iha universidade na'in hamutuk na’in 3.554 reprezenta 68%. Estudante sira ne'ebé la mai rejistu hamutuk na'in 1.664 reprezenta 32%, no ami sei hato'o ba parte universidade hodi bele foti desizaun ba estudante hirak ne'ebé la mai halo rejistrasaun", Dehan Diretór.
Iha sorin seluk, Visereitór ba Asuntu Akadémika no Garantia Kualidade, Profesór Dr. Samuel Venâncio de Sousa Freitas hateten, bazeia ba lista estudante foun ne'ebé publika iha Jornál Repúblika hamutuk na'in 5218, no estudante ne'ebé rejistu tuir data-prazu ne'ebé fó-sai hamutuk 3554.
"Tuir lista estudante foun ne'ebé fó sai iha Jornál Repúblika hamutuk na'in 5218, no estudante ne'ebé mai rejistu hodi tuir orientasaun na'in 3.554, nune'e husu ba estudante sira ne'ebé seidauk mai halo rezistrasaun bele mai rejistu antes tama ba iha prosesu ensinu aprendisajen", Dehan Visereitór.
Totál estudante ne'ebé rejistu 3.554 distribui ba Faculdade de Agricultura (323), Faculdade de Engenharia Ciência e Tecnologia (389), Faculdade de Educação Artes e Humanidades (856), Faculdade de Medicina e Ciência da Saúde (444), Faculdade de Economia e Gestão (388), Faculdade de Direito (164), Faculdade de Ciências Sociais (659), Faculdade de Filosofia e Ciências Humana (100), Faculdade de Ciências Exata (65) no Faculdade de Turismo Artes Indústrias Critivas e Culturais (166).
Media UNTL
: Denilson Amandio Barros
: Denilson Amandio BarrosFoto
: Agostinho da Cruz
: Agostinho da Cruz