Universidade Nacional Timor Lorosa’e (UNTL) nia Vise-Dekanu Asuntu Akadémiku Faculdade de Ciências Sociais (FCS) Mestre Jose da Costa Magno hateten, fakuldade halo ona preparasaun ba orientasaun tinan Akadémiku no estudante foun sira ne’ebé rejista ona atu tuir orientasaun hamutuk na’in 692.
“Nu’udar komisaun organizadora ba preparasaun orientasaun estudante foun ano letivo 2025 hamutuk na’in 1.001, no hirak sira ne’ebé rejista ona iha komisaun Faculdade de Ciências Sosiais (FCS) nian mak 692.
Preparasaun ami prepara hotu ona, hein atu realiza de’it. Prosesu orientasaun ne’e sei hala’o iha 24-26 Marsu. Implementasaun ba atividade hotu sei servisu hamutuk ho Komisaun Organizadora sira envolve Asosiasaun Estudante iha FCS nian”, dehan Vise-Dekanu Magno iha Kampus Kaikoli, Díli (11/03).
Mestre Magno hateten, objetivu husi orientasaun atu ajuda estudante sira koñese universidade, fakuldade no kada departamentu, no hatudu kapasidade inteletual di’ak, no estudante ne’ebé matenek ho komportamentu diak, no hatene étika komunikasaun ho dosente, kolega, inan-aman no públiku, hodi bele kumpri regra ne’ebé eziste iha UNTL.
Iha fatin hanesan Senadu Estudante FCS nian, Cesaltino de Jesus hatete, preparasaun ba orientasaun husi FCS másimu komisaun sira estabelese hotu ona kompostu husi orientadór ho membru.
“Programa no materia ami prepara hotu ona, kona-ba regulamentu mak, estudante sira labele hemu tua, lanu, fuma, lori sasan kro’at, tolok/hasai liafuan aat, iha prosesu orientasaun nia laran.
Regra ba mane sira ne’ebé fu’uk naruk tesi halo badak no ba feto sira sui fu’uk halo kaber, depois kona-ba hahan estudante sira sei prepara rasik, hanesan bee no matabixu dader, hahan meudia no merenda loraik nian”, dehan Senadu Estudante Cesaltino.
Estudante ne’ebé admitidu ba FCS hamutuk na’in 1.001. husi totál ne’e estudante foun hamutuk na’in 692 no estudante tuan ne’bé la tuir orientasaun iha tinan 2024 na’in 9. Nune’e tótal estudante FCS (706) mak halo rejista iha fakuldade, hodi tuir orientasaun. Enkuantu estudante hamutuk na’in 309 mak la rejista.
Distribuisaun husi totál rejistadu 692 ba Departamento de Ciência Política (90), Política Públicas (73), Desenvolvimento Comunitário (82) Inclusão Social Comunitária (55), Relações Internacionais (112), Sosologia (67), Administração Pública (104) no Comunicação Social (113).
Media UNTL
: Antoneta Ximenes Conceicão Araújo (estajiária)
: Antoneta Ximenes Conceicão Araújo (estajiária)Foto
: Simproja Madeira, Jequino Viegas (estajiáriu) & Arkivu Asosiasaun Estudante FCS
: Simproja Madeira, Jequino Viegas (estajiáriu) & Arkivu Asosiasaun Estudante FCS