Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH,Ph.D ho Governadór BCTL (Banco Central de Timor-Leste) nian, Helder Lopes asina akordu ho Banco Central Timor Leste (BCTL) iha Auditóriu Kayrala Xanana Gusmão, Ministériu Finansas, Aitarak-Laran, Díli, (21/03).
Iha entrevista Reitór hatete, asina akordu ne’e ho objetivu atu koopera iha área finanseiru no ekonomia nian, atividade konferénsia, no tuir planu sei loke Pos Graduasaun iha área Finanseiru nian, liuliu BCTL mos bele finansia área peskiza sira.
“Ohin UNTL asina ona akordu ho BCTL hodi koopera iha área ekonomia no finanseira nian, no ita mos bele koopera hodi realiza semináriu, konferénsia sira, no sira mós bele finansia ita-nia peskiza sira tuir sira-nia kbiit, no ami mós deskuti hela planu ba futuru sei loke mós kursu Pós Graduasaun área finansa nian”, dehan Reitór.
Iha sorin seluk Governadór BCTL nian, Helder Lopes hatete, asina akordu refere ho intensaun atu hametin formasaun, peskiza no advokasia iha setór finanseiru no ekonomia.
“Ohin ita asiste hamutuk asina akordu entre BCTL ho UNTL ho intensaun hametin formasaun kapasitasaun, peskiza no advokasia iha setór finanseiru no ekonomia nian”, dehan Governadór BCTL.
Alende asina akordu ne’e, BCTL halo lansamentu mós ba Relatóriu Dezempeñu Ekonómiku Timor-Leste tinan 2024 ne’ebé ofisiálmente, lansa husi Primeiro-Ministro S.E. Kay Rala Xanana Gusmão, akompaña husi Vise-Primeiru-Ministru no Ministru Koordenadór ba Asuntu Ekonomia, Turizmu no Ambiente, S.E. Francisco Kalbuadi Lay no Prezidente Camara Comerçio Industria-TL, Sr. Jorge Serrano.
Partisipa iha serimónia lansamentu ne'e, Proreitór ba Asuntu Kooperasaun, Profesór Tomé Xavier Jerónimo, Dekanu Faculdade de Economia e Gestão, Profesór Filipe Mendes ho estrutura no dosente sira, estudante UNTL, Membru Governu sira, Setór Privadu, Parseiru Dezenvolvimentu, Akadémiku, Doadores Internasionál, Sosiedade Sivíl, nomós entidade relevante sira.
Media UNTL
: Leonia de Araújo da Costa
: Leonia de Araújo da CostaFoto
: Leonia de Araújo da Costa
: Leonia de Araújo da Costa